查證股神沽比亞迪係唔係真？幾時可以確定？

1. 日前瘋傳股神畢菲特沽比亞迪1211，股價大跌超過一成，到今日開始少咗人講，股價又回番5%，當然去返$300都仲有一段距離。
2. 作為散戶，我哋當然唔會知呢啲大股東或者主要股東嘅諗法，亦都唔會第一時間知佢哋增持咗幾多股份或者係沽咗幾多股份。
3. 但係證監會其實都有一啲法例規定要主要股東(substantial shareholders)，喺某啲股權變動嘅情況之下，需要喺限定時間內作出電子申報，從而俾公眾知道佢哋嘅持股變化。
4. 我覺得借住呢次比亞迪嘅事件，都想簡單同大家講吓係啲咩情況之下要作出披露，其實呢啲對大股東嘅基本披露要求，我哋有權知，亦應該要知！同埋估下究竟呢單嘢係嘅真相係發生緊咩事。
5. 成件事嘅背景可能大家都有睇新聞，就係話喺港交所嘅中央結算系統CCASS， 7月9號同埋7月11號之間，花旗銀行個倉對比亞迪嘅持倉由1.6億股增加到3.9億股，增幅有2.25 億股。

下面係7月9日嘅Citi Bank個倉持股

下面係7月11日嘅Citi Bank個倉持股

6. 而呢2.25億增幅剛剛同股神巴郡持有比亞迪嘅股數非常之接近，當然唔計零頭啦。

權益披露要求

7. 咁其實證監會嘅法例都有規定主要股東係喺佢哋嘅權益變化需要作出披露。
8. 首先最簡單個概念就係喺股權權益披露呢個範疇之內嘅主要股東嘅定義就係你持股5%或以上嘅投票權。
9. 假設股神真係沽貨，佢又會唔會中下面需要披露嘅事項呢？

• 當你首次持股5%或以上權益
• 當你個權益由5%或以上下降至5%以下
• 當你本身持股5%或以上，而你嘅持股變化跨越某個百分比率整數，例如：由5.2%增加到6.1%或者係由7.3%減至6.6%
• 當你本身持股5%或以上，你嘅持股性質有所改變
• 當你本身持股5%或以上，你持有超過1%嘅淡倉或者你由本身持有1%嘅淡倉變成少於1%嘅淡倉
• 當你本身持股5%或以上，你所持有淡倉跨越某個百分率整數即係好似由1.9%增加到2.1%
• 當你持有5%以上就嚟上市嘅公司嘅股份

10. 上面第4點係包括埋你借股份俾人，而扣除左你借俾人嗰部份股份之後，你嘅持股百分比率整數有冇變化？
11. 即係如果你持有5.6%股份，你借咗0.5%股俾人，咁你剩返5.1%股份，咁其實你係唔需要申報，因為百分比計整數無變都無5字。
12. 如果你持有5.6%股份，你借咗1%股份俾人，咁樣你持有股份就變成4.6%咁樣你就需要申報。
13. 好啦，講完咁多事項需要披露，咁我哋再apply 番，假如呢2.25億股股份轉倉，真係來自股神嘅話，究竟上面1至7樣事項，股神有邊啲事項有機會中而需要披露。
14. 股神係有機會因為上面嘅2、3、4事項而要作出權益披露。而2、3、4項事項嘅披露限期，係當件事發生咗之後嘅三個工作天。
15. 件事應該係11號發生，唔包括11號，三個工作天就係12、 13、 14。咁理論上如果係股神因為上邊 2、3、4嘅事項，佢最遲係今日內要喺權益披露嗰度申報返俾公眾知道。
16. 而家已經係7月14號晚上11點半，但喺港交所嘅權益披露網頁，依然睇唔到來自任何巴郡對比亞迪持股變化嘅一啲權益披露嘅申報。
17. 如果巴郡係唔係刻意犯法（我覺得唔會）唔喺限期內申報嘅話，就係代表上面2.25億股，喺呢一刻並唔係巴郡沽比亞迪股份。因為根本冇見到呢個申報。
18. 咁好囉，一天都光晒唔關巴郡事囉。喺呢一刻可以確定嘅，就係巴郡仲未沽比亞迪，所以市場個股價係今日回咗5%。但係點解唔係彈返去$300 ？因為我都只能講只係呢一刻佢未賣比亞迪。

另一個重點
19. 仲有另外一個重點變化，就係成個中央結算系統嘅股數亦都係增加咗2.25億股。

20. 中央結算系統股數增加代表有某部份股票由場外轉入場內。
21. 場內代表嘅係喺港交所中央結算系統，電子交易平台交易嘅股票；場外就係講緊一啲實物嘅股票。
22. 其實無論你係喺港交所嘅中央結算系統做電子場內交易，或者係場外以實物股票做交易，性質上其實都係冇分別嘅。
23. 只不過實物股票通常你要簽買賣合同，同埋你要去股份過戶處登記返個股份轉移，自己去稅局交印花稅等等。

24. 當然中央結算系統就會方便好多，一次過會charge 晒你所需嘅費用，券商嘅戶口會幫你證記哂啲股權變動。
25. 即係場內交易同場外交易最大嘅分別：一個會自動化電子化，一個就係好實物，即係所有嘢都好physically 咁做。
26. 當然你電子化嘅平台，你可以一次過對晒好多潛在買家或者賣家。相對實物股票，其實係中央結算系統交易的股票理論上個流通性係高好多。
27. 你有股份想賣，你喺條街問人要易啲，定係喺電子交易平台搵人接易啲？
28. 所以由實物股票轉入中央結算系統呢一步，其實就係要投入返一個高效益高流通性場內電子交易平台去進行交易。

29. 我都覺得呢2.25億股係來自巴郡，咁大批貨，個數又咁吻合，應該除咗係巴郡之外，好難有第二個。
30. 就算唔係巴郡，客觀效果，就係有大批貨由無咁方便交易嘅實物股票轉咗去方便交易嘅中央結算系統。
31. 咁樣通常揸實股，變咗揸電子股，你嘅目的係乜嘢呢？
32. 當然係為咗方便交易啦，咁你本身有貨為咗方便交易，咁當然係賣啦，亦都可以借俾人。
33. 呢一刻無申報，即係代表呢一刻無沽，或者叫仲未沽。
34. 但概然啲貨擺咗入去，就好有機會喺中、長期開始慢慢沽貨，可能係部署下個禮拜、下個月、今年年尾或者下年。

35. 所以個客觀合理嘅預測，就係佢開始有機會要沽貨。

關於比亞迪中期業績預告字眼
36. 我本身成日覺得佢純利會跌，但係佢今晚出嘅中期業績預期，話佢純利會升138%-206%。

37. 銷售收入我預咗大升，因為佢半年賣咗60幾萬架車，已經達到上年全年賣嘅數量水平（唔計上年賣嘅傳統燃油車，因為今年已經完全冇賣啦）。
38. 我做咗少少統計，睇番近兩年嘅年報同中報數據，用汽車銷售額除銷售量。2020年中報，平均車價19萬、2020年年報平均車價19萬、2021年中報平均車價15.5萬、2021年年報平均車價14.8萬，2022年第一季，平均車價都係約12、13萬。確實佢賣車係定價越嚟越低。
39. 而純利率，2021年中期係2.03%，2021年全年係1.88%，2022年第一季得1.21%。
40. 佢個汽車定價同純利率越嚟越低，所以點解我會覺得佢中期純利有機會下跌，量多但係利潤微薄。

41. 但佢既然預告左會上升1.3至2倍，咁即係代表佢嘅利潤率係唔差啦。究竟點解可以做到呢？
42. 其實佢有少少文字嘅描述，都可以知道佢大概情況。因為佢講咗新能源汽車只係銷量增長勢頭強勁，但係其實佢冇講過個車價或者個利潤率。當然佢有講因為呢個銷量增加而令到盈利大幅改善。
43. 而反而手機部件組裝業務佢就真係有講「控制成本能力提升，產品結構調整」，一睇到「產品結構調整」，肯定係毛利率係會升咗少少，所以佢最尾都話盈利能力有所恢復。

44. 所以我大概估計佢賣車嘅強勁銷售量，令到佢收入大增。另外佢手機業務嘅毛利率有改善。
45. 咁其實佢最後嘅純利率只要增加少少，例如由上年同期嘅1.2%增加到2.5%，佢已經可以做到個業績預期嘅純利增幅。

46. 所以佢規模咁大，某啲費用控制下，或者叫做分落下半年先入，都可以令到純利大增。
47. 對上一篇講比亞迪嘅時候，我始終覺得個盈利能力較為弱，咁當然佢而家純利大增，我又真係唔可以再用呢一樣嘢去否定佢，可以講叫做有一啲改善，短期股價可能會有支持因為業務上好似唔可以再有嘢挑剔佢。
48. 不過始終2.25億嘅沽壓風險依然存在，因為比亞迪回應都係話以權益披露為準，但未見減持信息，即係都係講呢一刻無，但又無好強烈否認，所以都係再望下有冇新進展先。

股權披露連結
https://di.hkex.com.hk/di/NSSrchMethod.aspx?src=MAIN&lang=ZH&in=1&

中央結算系統連結（睇唔同券商個倉嘅持股比例）
https://www3.hkexnews.hk/sdw/search/searchsdw_c.aspx

聲明：以上內容純屬個人意見及分享，並不構成投資、買賣建議或推薦
Credit: CFO講年報