比亞迪盈喜啟示

1. 比亞迪個第一季盈利預喜，股東應佔純利，表現亮麗，增幅介乎174 - 300%。
2. 比較起2021年嘅第一季2.3億純利，2022年第一季預期會有6.5億至9.5億股東應佔純利。咪住，個預期純利range 有成3億咁大嘅？咁究竟係6億定9億啫？高端同低端差距好遠喎！？

3. 正路 4月已經過咗差唔多三個星期，第一季嘅經營數據應該已經核算完畢，剩返未確定嘅應該都係一啲無咁重要嘅非經營嘅數啦。
4. 不過 BYD 出一個咁大嘅range預測，代表有啲未確定嘅業績數據，上落空間有3億咁多，咁會係啲咩未確定數據有咁大影響之餘，但你又要急不及待喺確定呢一部份嘅數據之前就要出個咁大range 嘅盈利預喜？其實博乜呢？
5. 其實個盈利預喜關於第一季收入增幅係幾多都冇提，上年差勁嘅毛利率有冇改善又冇講，所以成個公告嘅訊息根本就係模棱兩可，俾到市場嘅只係一個訊息：純利大增。
6. 比較起睇佢嘅純利，我哋其實更應該關心佢嘅毛利率有冇改善， 2021年毛利率其實做得好差，得11%。
7. 不過睇返佢四月初公布嘅一至三月汽車銷售量同生產量，的確有着好明顯嘅改變，佢嘅電動車佔比同傳統燃油車係98%vs2%，呢個比例係2021年都只係81%比19%， 而上年同期係51%vs49%。
8. 唔知係咪佢傳統燃油車嘅生產設備已經完全折舊 ，所以幾乎可以放棄生產傳統燃油車，成個第一季只係生產 4,000 多架燃油車。
9. 而電動車頭三個月已經出產左同賣咗28萬架。2021年全年電動車銷售同生產都大約係60萬架，而家一季28萬架，2022全年必破百萬架。
10. 合理預計，佢嘅毛利率係今年中期、全年（如果係high end 嘅，甚至可能第一季）都應該有明顯提升，因為你產量大幅增加（60萬去到百萬），必然會攤薄每架車嘅平均固定成本，從而拉低銷售成本提升毛利率。可能，今年係比亞迪電動汽車起飛嘅一年。
11. 另外一樣值得留意嘅就係佢嘅盈喜公告，有提到手機部件組裝業務行業需求疲弱，台積電Q1業績都有講過智能電話芯片嘅需求增長只有1%，所以睇嚟智能手機板塊今年第一季業績表現都不容樂觀。

聲明：以上內容純屬個人意見及分享，並不構成投資、買賣建議或推薦
Credit: CFO講年報