短評三隻汽車零件股

又去到盈喜及盈警的季節，但睇細節位，計吓數，先會睇得清個大picture。

以汽車零件股為例，億和(838)上周發盈喜，預期全年賺1.2億至1.5億元，對比上一年度是錄得1500萬元虧損，虧轉盈牌面上梗係利好啦，但留意返兩個重點，億和半年純利是6792萬元，所以扭虧不再是新消息，另外就是股價在10月起飛，由0.75元起步炒，現價1.8元左右。如全年賺1.2億，即下半年賺5210萬元，唔掂喎，如全年賺1.5億元，8208萬元，比上半年再高兩成，咁就靚仔了。32億市值，賺1.5億元，市盈率21倍，唔算便宜亦不算貴，雞肋位。

賽晶科技(580)上周發盈警，預期全年賺1000至2000萬人仔，對比上年度的1.77億元，當然是大幅減少了，睇返半年條數，是蝕1095萬人仔，換言之下半年是賺2095萬至3095萬人仔，大幅好轉喎，但青冰睇返2016年至今的半年度盈利，大致係賺八千萬至一億，即使佢下半年係賺3095萬元甚至更多，也不能算很叻仔，雖然最近從高位回吐了四成，估值仍偏高似乎是事實。

耐世特(1316)今日忽然搶高7%，現時市盈率只得17倍，比億和更低，佢的客戶主要是國際大品牌的車廠，而2022年更會加入Tesla陣營，之不過，大家都記得青冰早前點講啦，大行在去年第四季見過管理層，管理層坦言第四季應該一般，本身希望2021年度的盈利可回升至2019年，2019年全年賺2.3億美元，2020年度賺1.16億美元，2021年上半年賺8314萬美元，雖然話追唔到全年2.3億美元，但比2020年好應不是問題，所以近月唔識行，都係反映了第四季麻麻，然而只要是跟2020年差不多，17倍市盈率是可靠可信的，雖然市值及增長應不及億和，但如果覺得億和是抵買，咁耐世特也不應被忽視。

相關文章：
恒指以近10年最差收市 全年挫14%

聲明：以上內容純屬個人意見及分享，並不構成投資、買賣建議或推薦
Credit: 青冰投資