宏觀經濟學原理——解構聯儲局加息

關於加息，我今日嘗試用一個較簡單、易明、一層層，不過都幾長嘅說明去講清楚。有啲係基本原理，有啲係我個人見解。

先睇吓聯儲局立場，進入狀態：

1. 首先，今日只集中講美國市場，當然美元係世界儲備貨幣，美國市場變化都會影響到全世界嘅經濟。
2. 基本嘢：政府影響經濟嘅措施主要有兩樣：一、財政政策（fiscal policy ）即係政府點樣使錢（財政預算）同埋點樣收錢（稅收）。
3. 二、貨幣政策（monetary policy ）即係點樣增加、減少貨幣供應、調節利率從而影響經濟。
4. 今日講嘅加息係貨幣政策嘅範疇。
5. 同你打定個定心丸，其實啲嘢唔係好難，只要記住所有嘅原理都係建基於供求關係之下市場嘅行為。
6. 供求關係係重中之重嘅concept，即係所有市場參與者都係做緊利益最大化嘅行為，要有錢賺，同埋要賺最多。記住呢點，所有人都可以明白呢啲經濟學原理。
7. 不過明白歸明白，個複雜性係，點樣去預測呢啲政策實施之後所帶來對市場嘅影響，即係話令到市場行為嘅轉變係唔係喺你政策設計嘅原意之內？
8. 呢個係不確定嘅。就好似一隻藥點樣先叫有效，係要有大量數據，長時間證實個效果，經濟政策根本就係醫經濟嘅藥，醫咗，唔一定醫好，要試，呢個係最難。
9. 聯儲局份工易唔易做？
10. 如果佢所定立嘅政策係一直對市場行之有效嘅，佢份工就好易做，但係有冇效，除咗憑以往嘅經驗同埋歷史數據去估計之外，仲要睇返係佢推行新政策之後，真正嘅市場反應同數據結果。
11. 佢哋嘅難處係，隨着市場錯綜複雜嘅結構性變化，往往以前係有效嘅貨幣政策，喺呢一刻再次推行嘅時候，效力可能會大減或者係消失。
12. 所以佢地都係摸着石頭過河，即係佢哋一半係做緊調節市場嘅措施，另一半其實係做緊探索市場嘅行為，即係做緊實驗。要有市場數據去支持成效。所以今次，控制通脹，遇著疫情、供應鏈、打仗、滯脹問題、孳息率倒掛（即係市場對衰退預期），其實唔知幾時或者可唔可以軟著陸。
13. 滯脹問題、孳息率倒掛之後都可以詳細講。今日cover唔哂。
14. 所以聯儲局話通脹係暫時性嘅，佢哋堅決要用調整利率控制通脹，大方向一定岩，但個過程或者係副作用就無人說得準。
15. 點解我要講咁多開場白？就係要鼓勵你繼續睇落去，因為係有啲長同埋有啲艱辛，但每一個你都有能力明晒所有嘢，調返轉，聯儲局嗰班學者都未必明晒個市場發生緊咩事啦。

聯儲局加息

16. 入正題，成日講聯儲局加息，其實佢地想加嘅係聯邦儲備基金利率(Fed Fund Rate)。呢個最主要係美國所有銀行之間借一晚錢嘅利率成本，即係隔夜同業拆息。
17. 銀行嘅資金來源，一係就係我地嘅存款，一係就係中央銀行借錢俾佢地，一係就係銀行之間借錢，視乎各銀行喺嗰一刻有無資金需求，而其他銀行有無資閒置資金供應。
18. 美國聯儲局所謂加息，就係要影響呢一個拆息利率，從而將銀行拆借資金成本傳導去成個市場，影響整個市場嘅所有利率走勢。
19. 因為銀行嘅最基本資金利息成本改變（隔夜拆息），佢地借錢出去俾個市場個息口都會on top of呢個隔夜拆息去定個借出去嘅息率（好似cost plus嘅定價策略）。 銀行無理由借錢出去要收嘅息仲低過自己借錢返嚟要俾嘅利息。
20. 聯儲局唔會強行指導或者用行政手段去要求銀行以一個特定利率去同成個市場做資金借貸交易。
21. 聯儲局其實就係中央銀行，中央銀行有法定貨幣發行權，所以佢本身就係成個銀行體系最大嘅參與者，基本概諗：佢就係所有其他銀行嘅銀行。
22. 佢參與市場，係透過決定1）接收其他銀行嘅存款，同埋俾幾多利息俾呢啲存款。2）借錢俾其他銀行，同埋決定要收幾多其他銀行嘅利息。
23. 即係聯儲局參與市場，存錢、借錢、俾幾多息、收幾多息，從而俾其他銀行以自身商業決定（利益最大化）會唔會存錢、借錢喺聯儲局，從而影響呢啲銀行拆借出去市場嘅息率，影響整個市場利率變化。
24. 如果，你有細心留意新聞，聯儲局加息用嘅字眼唔係話加0.25%或者加0.5%， 而係會話將「目標」利率「區間」提升0.25%或者0.5%。
25. 「目標」係因為佢要參與市場（所以籠統啲叫Open Market Operation），透過市場調節機制去達到佢想要嘅利率水平，而唔係強制銀行死跟，而係銀行按自己對資金供求去參與喺個市場度，從而形成目標利率。掉轉講，個目標係可以唔能夠達成嘅，下面point 35開始會講。
26. 「區間」係指聯儲局係想個Fed Fund Rate 調節到佢所定立嘅range 之內，即係銀行間嘅拆借利息係唔會超出個區間嘅上下限。因為聯儲局要加減利息之餘，都要利率波動有個譜，如果，無譜，市場嘅利率風險就好難控制，成個經濟會好唔穩定。
27. 所以當聯儲局話要加息0.25%，即係佢係提高緊個目標區間嘅上、下限，上限+0.25%，下限加+0.25%，只要係上、下限息率係對市場有效嘅，按銀行嘅市場行為，當下限提高咗，咁即係個Fed Fund Rate都會升咗，咁就形成左加息效果。但係唔係一定有效。
28. 區間上、下限係咩利率？而家嘅上限係IOER（interest on excess reserve），下限係ON RRP (overnight reverse repurchase agreement)。詳細操作唔講，但個效果就係其實兩個都係聯儲局俾出去嘅利息利率。IOER高啲，ON RRP低啲。
29. IOER，而家係1%，係銀行特定部份嘅超額儲備金，所以可以存款喺聯儲局而所收取嘅利息利率。
30. 「超額」儲備金，係代表銀行有啲多餘嘅錢無借出去俾個市場（因為聯儲局實在印太多錢）。
31. 「特定部份」係呢啲銀行持有嘅超額儲備金只可以有特定部份存款喺聯儲局係可以收IOER，而超出呢個特定部份，聯儲局就唔會俾IOER，但會俾ON RRP，而家係0.75%。
32. 同時，聯儲局俾IOER只係接受銀行存款，而俾ON RRP係接受銀行同埋一啲非銀行嘅金融機構存款（因為咁樣聯儲局嘅利率政策可以更快更直接傳導去市場，因為唔使下下要只係透過銀行體系去傳導利率政策）。
33. 依家就講吓目標區間上、下限嘅有效性。
34. 先要記住有效性嘅意思係聯儲局想控制「銀行與銀行之間」嘅隔夜拆借利率係要喺呢個範圍之內。
35. 先睇下限ON RRP 0.75%。如果係有效嘅，代表銀行無論係咩情況之下都唔會喺同業之間以低於呢個下限嘅利率去做拆借。
36. 呢個容易啲明，因為當銀行A問任何銀行借錢，但銀行A只願意出低過ON RRP嘅利率，咁唔會有一間銀行願意借錢俾銀行A，因為佢哋只要將嗰筆錢擺喺聯儲局，就會收到高過銀行A所願意俾嘅利息，即係ON RRP，所以銀行A最少要俾嘅借錢利息就係ON RRP，呢個係apply 落所有銀行，所以呢個就係成個銀行之間拆借嘅最低利率，即係下限。
37. 至於上限IOER，當銀行A去借錢但係其他銀行要求收嘅利率高過IOER，銀行A會先問自己：我借呢筆錢嘅用途係乜嘢？短期就係只係存款落聯儲局。咁聯儲局會俾幾多息你？最多係IOER。
38. 因為而家係講緊銀行之間嘅拆借行為，如果銀行A借錢成本係高過IOER 咁佢擺落去聯儲局嘅存款，只可以賺到IOER，咁樣變咗佢會蝕錢。所以佢唔會問其他銀行借高於IOER嘅利率嘅錢，所有銀行都唔會，所以形成區間上限。
39. 你可能會諗，佢可以借出去比個市場，嘗試收取更高利率。但係你要留意呢個係銀行之間好短期嘅一個拆借行為，代表係果一刻市場未必會需要有一個借貸嘅需求願意比高過呢一個IOER嘅利息。
40. 所以銀行利用呢啲超額儲備金去賺取利息收入嘅最高利息就係IOER。
41. 但係呢個IOER嘅上限有效性唔係永遠都work，好簡單就係當出面個市場有人願意比高過IOER嘅時候，銀行之間嘅拆借就可以高過IOER，因為有利可圖。
42. 但係係咩情況之下銀行有呢個資金出路呢？其實就係資金開始緊張嘅時候。由於而家貨幣供應太充足，市場利率極低，銀行呢啲超額儲備金本身就係喺短期冇辦法借出去個市場，所以佢哋唯一有利可圖嘅方法就係存款落聯儲局。
43. 但係當如果聯儲局不斷收水縮表，市場資金開始緊張短缺，市場就會願意出更高嘅利率去問銀行借錢，咁銀行之間拆借就會高過呢個IOER，咁聯儲局想控制Fed Fund Rate 喺一個佢目標嘅範圍上限就會失效，就會做成市場利率波動性大增，當然佢仲可以用貼現率去控制個上限，呢個今日唔講住，會變得再復雜啲，同埋而家已/暫時唔需要。
44. 再重複：聯儲局透過控制目標利率區間上、下限，上、下限，各+0.25%（今年3月） 或者+0.5%（今年5月）去提升銀行之間拆借利息成本，從而令到銀行借出去市場嘅利息都會上升，從而達到加息嘅效果。
45. 但係由於實際嘅貨幣供應係依然非常氾濫，佢哋+0.25%或者+0.5%嘅實際對市場效果係有限嘅，但係同一時間會影響咗成個市場對將來息口走勢嘅預期
46. 例如市場國債持有人會開始賣咗已經發行咗嘅國債，因為佢哋期待之後發行國債個票面利率會更高，債價要下跌，所以債息前排5月中上升（呢個係債嘅原理，下一篇講國債會詳細講）；
47. 又例如放債人呢刻會減少放新債，或者要求提高利率先肯借出新債，因為佢地知道市場未來利率會上升，而家唔加息，簽咗約，如果固定利率，就會食唔到個將來利息升浪，所以呢一刻借款人就已經要提高借款利息，放債人先至願意借新錢俾佢地。
48. 所以而家聯儲局加咗兩次息，幅度唔大，但形成將來持續加息預期，亦都會令市場早一步已經調整緊個利率走勢。
49. 聯儲局加息係會影響短期利率走勢，因為佢係影響緊銀行之間嘅隔夜拆息，當然呢個亦都會慢慢傳導去中、長嘅利率走勢。但呢個係間接嘅，需要市場慢慢調節，慢慢傳導出去。
50. 不過當6月1號開始（正如我幅圖cap 圖裏面underline)聯儲局正式縮表，咁樣個影響力就係直接同埋大好多。
51. 縮表簡單啲嚟講就係聯儲局將啲國債或者嗰啲按揭證券賣番俾市場，從而喺市場攞返啲資金，即係貨幣供應會減少，即係直接收水，個市場水緊，所有市場參與者都願意俾高啲借錢嘅成本，或者借少啲錢（又係供求關係），所以利率會上升。
52. 呢個利率嘅變化會相對聯儲局加息快好多，亦都影響大好多，當然市場已經預期左有呢一樣嘢發生。

聲明：以上內容純屬個人意見及分享，並不構成投資、買賣建議或推薦
Credit: CFO講年報