恒指季檢後的部署

恒指季檢永遠都係製造驚喜，所以青冰近一年都係用大包圍的形式去玩，今次落注的股份有中升(0881)、華潤啤酒(0291)、農夫山泉(9633)及李寧(2331)，其實李寧就只係因績優又有國策支持，並唔係全為染藍而博，點知竟然係中呢隻，這個賽果跟上季一樣，博思摩爾(6969)、農夫山泉、京東健康(6618)及碧桂園服務(6098)，而碧桂園服務係最後一日才入埸，可見信心都係一般，點知就係中呢隻，上次一隻升就夠幫其他股埋單，希望今次都係。

今次加入李寧，信義玻璃(0868)及招行(3968)，最意外的不是李寧，而是招行，真係無諗過會踢走交行(3328)而成全招行，招行染藍後的比重有2.02%，算幾重手，李寧亦都唔低，有1.65%，兩隻都係強勢股份，後者更有國策支持，只要唔當波鞋波衫係奢侈品，有違共富原則，染藍前應該都會繼續硬淨，唔好忘記李寧今次係同時入恒指及國指，買盤成雙；雖然信義玻璃(0868)佔的比重只有0.48%，但由於公司keep住回購，加埋指數基金的買盤，所以這股是三隻之中防守力最高。

而綜合指數的變動，好明顯就是厚此薄彼，對半新股的優待太明顯，論質素及業務前景，點會揀百融雲(6608)及聯易融科技(9959)而棄力勁(0558)、完美醫療(1830)及醫思健康(2138)呢？今次加入17隻的成份股，當中有幾隻係入唔到港股通的，例如百融雲及聯易融科技，本身是採用同股不同權架構，所以要上市半年後才會被滬深交易所考慮，福萊特玻璃(6865)早前A股掛牌後，已經納入了港股通，所以今次進入綜合指數，沒太大實質意義，攜程(9961)是第二上市股份，又係唔入得。剩低13隻，當中以時代天使(6699)最有北水味道，開拓藥業(9939)有疫苗概念，亦有機會，而奈雪的茶(2150)及朝雲(6601)在國內都有知名度，但比招股價實在潛得太深，北水有冇興趣幫蟹民解圍，實在存疑；科濟藥業(2171)及卜蜂國際(0043)可能是較冷門的選擇。至於香港科技探索(1137)及和黃醫藥(0013)，前者本地味較重，北水未必看得上，而北水向來都唔太吼誠哥的股，所以應該無乜北水買和黃醫藥喇。

聲明：以上內容純屬個人意見及分享，並不構成投資、買賣建議或推薦
Credit: 青冰投資