元宇宙要軟硬兼備

要炒元宇宙股，相信首要的是學懂甚麼叫元宇宙，坦白講青冰一個月前都係零知識，近幾星期惡補後，再看了幾個報告，似是而非地將認識由零，提升至唔係零。要完全明白元宇宙，暫時不太可能，因為正如早幾日騰訊(0700)業績會時，總裁劉熾平所說，元宇宙是一個令人激動，但模糊的概念，青冰早前看的投行報告，引述Facebook、Nvidia及Tesla的領導人對元宇宙的見解，抽象得來都幾唔同的。

要發展元宇宙，相信仍有一段頗長的路途，十年八載肯定唔少得，但是否完全沒投資價值呢？在此我們可以從5G的發展作借鏡，翻查記錄，2013年時三星及華為分別宣佈，將投入巨資發展5G網絡，隨後2016年，Google、英國電訊、諾基亞及Qualcomm等大企業，亦相繼加入5G的發展，一直去到2019年，5G才開始商用，來到2021年的今天，5G開始普及，可能戰友們都仲未轉用5G，但現時講5G發展已經成熟，應該沒人會反對。由三星及華為「吹雞」開始計，差不多用了八年才算得上成熟。Facebook創辦人朱克伯格及Nvidia創辦人黃仁勳今年才「吹雞」元宇宙，你話要搞幾耐先會見到元宇宙普及化呢。

不過作為投資者，應該明白股票永遠都係向前炒，你話5G最當炒是否2021年呢？應該係兩、三年前囉，炒憧憬總是最璀璨最美麗的，所以即使元宇宙仍然幾咁離地，都係時候要做研究及適度參與。

睇完幾份報告，元宇宙給青冰的印象是虛擬世界，用3D影像方式表現，虛擬及真實互相交替，集社交遊戲娛樂於一身。如果要分階段，首階段必然是用3D影像去玩社交、遊戲及其他娛樂，然後到各方面技術都ready的時候，才能發展到好似Matrix套戲咁，真實同虛擬世界都分唔清。所以講起元宇宙，大家首先想到的必然是Virtual reality(VR)及Augmented Reality(AR)，跟住就諗如何在VR及AR的幫助下，發展遊戲、社交及娛樂。

要發展VR及AR，自然就要有硬件配合，VR頭戴裝置你一定見過，但應該未有衝動會想去買吧，直至某天有隻game或有套戲用VR頭戴裝置會好正，又或者個裝置經改良後細咗又型咗，就會考慮買啦。所以在元宇宙之初，頭戴裝置產業鏈會受惠，與此同時，要有良好的軟件配套(即係遊戲/電影/娛樂/社交)，才可以做成朋輩效應，喂好好玩喎，你買佢又買，有這一軟一硬加速發展虛擬世界，才會有基礎去發展下一個階段。

因此第一階段要買的股，應該要圍繞著頭戴裝置及軟件配套。現時主流的頭戴裝置是FB旗下的Oculus及HTC，產業鏈相關股就請睇附圖，至於軟件配套，其實範疇很大，有社交功能及早已建構了虛擬世界遊戲的應看高一線，有軟有硬之後，就要睇GPU的運算力，才可以將3D感覺體現出來，咁晶片股都係以NVDA為首吧。

以上就是青冰做完功課後，對元宇宙的理解，至於個股點睇，之後再另文分析了。

聲明：以上內容純屬個人意見及分享，並不構成投資、買賣建議或推薦
Credit: 青冰投資