解讀Netflix 2022Q3業績
2022 Q3業績重點
1. Q3業績算平穩，收入79億（美元下同），同比升6%。如果唔計強美元因素，升13%，同Q2、Q1增幅差唔多。
2. 經營利潤率接近20%，都算緊貼到上幾季表現。但有樣嘢如果佢可以做得好啲，利潤率仲可以提高。
3. 海外業務，訂閱費用收外幣，呢個好正常。喺做合併財報，外幣收入轉換做美元時，因為美元升值緊，會有匯兌虧損。所以今季收入增長，有-7%受匯率影響。
4. 但佢嘅成本就主係要用美元找數，明明好多外語劇，好明顯都唔係喺美國拍，點解成本會要俾美元？
5. 實際情況我唔知，我估可能上一、兩年喺搵外國制作公司拍劇時，合約寫明係美元計價。當時美國零息，俾美元係防止匯兌風險嘅合理做法。
6. 但而家都2022年10月啦， 都加咗幾次息，明知啲息係咁升，點解簽合約時唔轉當地貨幣計價？如果識得及時轉，利潤率就一定可以提升多啲。
榨取邊際收入：付費account sharing
7. 嚟緊2023年，佢地會喺某啲區域開始打擊Netflix 寄生族。Standard 同 Premium 用戶，可以有兩個share account quota俾佢地而家免費share 緊 account 嘅寄生族朋友。
8. 呢兩個friends可以用較低啲啲嘅價錢，訂閱account sharing plan。同時，佢地可以將以前寄生喺原始account 嘅個人觀看記錄，transfer到佢地新訂閱嘅account sharing plan帳戶。
9. 咁成個account sharing plan個賣點就係價錢平少少，引你呢班寄生族肯俾錢訂閱，同時再幫你自己以前辛苦儲落嘅觀看記錄轉到自己嘅account sharing plan新帳戶，去吸引新訂閱。
10. 實有一批寄生族係會訂閱，但有幾多? 無人知。佢Q1業績講過，2億訂閱用戶，有1億寄生族，呢1億係收入新增長點嘅big opportunity。
11. 坦白講，我都係寄生族，對我嚟講，Netflix 係可有可無，有時間、免費同埋最緊要有啲好hit嘅program，我係會花時間睇，但就唔係佢業績所講嘅睇到沉船嗰種用戶。
12. 所以佢自己都唔知個效果，如果推個account sharing plan出去，點知訂閱用戶淨增長同平時差唔多，咁咪即係好少寄生族沉船，咁佢以後就唔可以吹1億用戶商機啦。
榨取邊際收入: 廣告plan
13. YouTube 由免費做起，但要你睇廣告；之後開收費plan，可以唔使睇廣告同唔開畫面聽YouTube。
14. 但掉番轉，Netflix 一開始係收費plan，而家有廣告plan，正常應該係免費。但如果係完全免費，佢又驚搶咗本身無廣告plan嘅用戶。
15. 所以而家就不倫不類，又要收錢（比無廣告plan平20%-40%），雖然平少少，但又要你睇廣告，實制上會吸引咩人訂閱？
16. 佢個原意就係一啲肯俾錢、肯睇廣告、好想睇Netflix、但仲未訂閱嘅人。即係乜都無所謂嘅人。
17. 咁嘅人，er…應該都已經訂閱咗啦? 呢類人總數唔知有幾多，但仲有未訂閱嘅應該唔多掛？個效果都無係人知。
唔出訂閱人數變化預測嘅真正原因
18. 業績用Guidance Evolution 去帶出呢個變化，其實有幾evolutionary呢？表面解說：因為嚟緊有新加廣告收入、同付費sharing account 收入，呢啲收入唔會完全睇訂閱人數變化做指標。
19. 我只可以講，無論係廣告收入定sharing account 收入，本身都係想吸引多啲唔同潛在用戶訂閱，咁淨增加人用戶人數預測，點會唔緊要？個理由好牽強囉。
20. 作為上市公司，好嘢唔怕多啲、早啲出。你唔想出，用牽強理由去解釋，唯一理由，我覺得係管理層都唔知會有咩最終效果，會難以掌握同好波動。
21. 因為佢地2023年上半年應該會瘋狂地喺唔同地區試廣告plan同付費account sharing plan。
22. 但係佢地真係心中無譜，唔知呢啲新plan成唔成功，如果攪完訂閱人數無乜大增，咁即係呢啲新plan係唔work啦。
23. 所以原本2023年1月時出嘅2022年Q4業績，要出2023年Q1訂閱人數變化預測，就可以拖到2023年4月先出實際數，因為2023年4月先會出2023Q1業績。
24. 咁起碼喺2023年頭4個月，市場都俾唔到佢地做呢場試驗嘅壓力，因為做得好唔好，2023年1月唔洗俾預測，到4月先俾實際數。
25. 到時2、3月如果見到個trend做得幾好，咪4月照出實際數；如果見勢色唔對，都有一、兩個月時間去諗plan B，去應對市場嘅質疑，唔係而家咁，未發生嘅已經要俾市場Chur住哂。
結論
26. 其實講過好多次，Netflix拍劇成本同訂閱收入之間唔係有好高相關性。即係拍劇唔係話洗得多錢，就一定收入會高。
27. 而係拍劇已經洗咗咁多錢，而家你要諗辦法，將每一蚊洗嘅錢所能產生嘅收入最大化，佢自己業績都係咁講。
28. 所以點解，當佢預測2022年Q4訂閱人數淨增長450萬嘅同時，你要留意埋經營利潤率將會跌到4.2%。要知道，不嬲Q1-Q3都係19%-25%。
29. 其實係仲低過2018年Q4嘅5.2%，但係嗰時講緊有800萬訂閱人數淨增加；就算係上年Q4，經營利潤率得8%，都有成820萬訂閱人數淨增加。
30. 即係再一次印證佢業務做得越嚟越辛苦，要燒更多嘅錢，但新增嘅人數就越嚟越少。觀眾越嚟越難討好，嗰季唔燒錢，拍多啲劇同節目，嗰季就即刻減少訂閱數。
31. 坦白講，所以我覺得串流訂閱收入都到頂㗎啦。廣告plan同付費account sharing呢啲都係不痛不癢，幫助唔大。反而可唔可以推多啲受歡迎節目嘅IP周邊產品作銷售，開到另一條業務線嚟得更實際。
32. 遊戲業務可能都有潛力，不過呢一刻佢地講緊嘅係仲學緊點樣please game player，所以仲係未有料到。所以Netflix呢一刻我始終都係唔睇好。
聲明：以上內容純屬個人意見及分享，並不構成投資、買賣建議或推薦
Credit: CFO講年報
