制定執倉及逃生計畫

昨天個市急挫，源頭係教育股被「雙減」的消息屠殺，騰訊音樂被要求解除境內獨家版權，而美團(3690)亦受外賣員新規保障嚇窒，一時之間幾個壞消息打埋嚟，做就了千一點的跌市。

但唔知戰友有冇留意，其實教育股被規管的消息，於三月時已講過一次，早應抱有戒心，當然今次的規限就更清楚更嚴重，學科類培訓機構統一為非牟利，該等機構不可融資上市，嚴禁資本運作，雖然青冰不熟識教育股，但以字面解釋，若落實執行，有好多上市公司應該係要關門大吉的，所以有大行對教育股瘋狂劈目標價，係可以理解。

一石激起千重浪，別以為教育股死唔關其他股事，近期連串打壓不同的行業，外資自然會避險走人，今日北向的滬深股通，錄得128億人民幣的淨流出，是一年以來最多，加上近年不少進取型的基金，都以教育股、物管股及醫藥股為建倉重心，教育股暴瀉，無論是基金、大戶及小戶，有用孖展的必然被牽連，被追孖展又唔想(或者無力)補倉，就要沽倉內其他股份，火燒連環船效應之下，昨天有好多唔關事的股都要陪跌，昨天百大成交中，急跌者大部分都是科網、高估值類及今年累積升幅巨大的股份，除非戰友成手都係公用股，否則昨天輸到 hihi 係好正常嘅事。

打逆境波是困難的，但個市日後一定再畀機會你執倉，就睇你會否把握得好。執倉技巧都係老生常談，輸錢的無得留低，唔捨得沽可以先行沽半，仍有贏錢水位的股份，可認真審視其行業環境現況，估算中期業績的大致表現，再配合返自己的倉位，若幾方面都不是太差，其實可以搵位加注，但就切忌跌了一、兩成走去溝貨，學壞咗手勢，日後更難改正。對於整個倉位而言，必須制定一個Exit Plan，由贏變輸，由輸變大輸，之後才搵逃生門就太遲了，更甚者是連逃生也不做，索性熄機唔睇股，由得啲股自生自滅，從此就會踏上韭菜之路。

昨天港隊張家朗奪得金牌，接受訪問時講到：「係咁退唔係辦法，有時都要上前打，搶返主動權，大家要堅持，唔好咁易放棄。」投資都係，唔好咁易放棄熄機，要拿回主動權，積極處理倉位，逆境中慢慢打返條路出來，共勉之。

聲明：以上內容純屬個人意見及分享，並不構成投資、買賣建議或推薦
Credit: 青冰投資