跌市原因諗真啲

今日的跌市原因，主要有兩個，路透社報導中央的一個閉門會議中，提醒香港地產商應該要支持中央解決本港房屋問題，並指出遊戲規則已改變，不會再容忍有壟斷行為；另一個就是恒大(3333)的問題仍然未解決，市場開始注視相關的理財產品風險。

經過最近半年打壓各行業，相信投資者都不會對劍指本港地產商而感到驚訝，但對於早前被打的行業，消息都是由官方而發，平台壟斷、遊戲、教育及賭股全部都係，賭股是由澳門政府公佈諮詢再滲啲目標指引出來，所以賭股才會跌兩成以上，好喇，今次本港地產商呢，其實只係一個外媒報導，究竟真確性有幾高呢？大家都唔知，但肯定的是，現在人心虛怯，有乜風吹草動，一定係洗咗先算。

雖然話消息真實性成疑，但要解決房屋問題，其實講咗好多年，但地產商就hea住做，所以唔見成效，最終要揸正嚟落重藥，絕對係可以理解，所以今日四大地產商全部反艇，亦係非常正路，四大之中，持有農地最多的是恒地(0012)，又咁啱，今日跌最多的就是恒地，農地最少的長實(1113)就跌得相對少，又真係巧合，如果之後要從農地呢度開刀，四叔應該是最傷。

至於恒大，這個周末的壞消息雖有，但查實唔算好重大，亦都講唔上惡化了，因為已經非常之惡劣，現時綜觀各方面因素，應幾可肯定阿爺唔會救，只會拖慢個爆煲程序，逐步被接管、重組及拆骨，雖然這個慢爆方式是會拖累其他行家，但可能這個就是中央想達到的效果，住房不炒嘛，等你哋引以為戒。而今日收市後，行業內亦有首個拼購消息，碧桂園服務(6098)以100億元收購富力(2777)大股東手上的物管公司，富力去年以3.4億元向大股東出售此物管公司，被質疑是賤賣資產，一年之後，就由3億變百億，不過富力大股東都同時宣佈將向富力提供80億港元的資金，其24億元會在明天收到，碧桂園算係曲線救富力。這消息應會為明天的內房提供反彈藉口，彈到幾多就唔知，但行業加速拼購，解決資金問題，應該是未來走出困境的新路向。

兩個跌市主因似乎都跟外圍無關，但執筆之時歐美股市都下挫，美股三大指數跌1.5至2%，相對於港股嚟講真係雞碎啦，但點解港股暴跌又會影響到歐美股市呢？留意返星期三晚美國聯儲局會議息，有機會是借勢食糊，加上最近幾個月美股都無試過大調整，如果今晚以大跌收場，不需感到意外，可能今日港股係行先一步，明天會企穩添。

聲明：以上內容純屬個人意見及分享，並不構成投資、買賣建議或推薦
Credit: 青冰投資