商湯(20)2022中期業績點評

呢類文章係隔幾個月後睇都會歷久常新。因為我係分析佢地業務模式，呢個係所有上市公司日復日、年復年嘅經營方法，唔會話幾個星期、一兩個月就會變。

我亦都會講當其時間公司嘅業績狀態，之後就會每季、每半年持續跟進佢地狀態變化、當然都會不斷擴闊到唔同板塊嘅上市公司，所以長期跟開我嘅文章，你就會由俾上市公司食住嘅韮菜，變成睇穿佢哋，食返佢地嘅精明投資者。所以今次再講商湯，會嘗試重點短評佢嘅中期業績。

1. 商湯一如我前文所講，虧損喺2022年中期開始縮窄。
2. 因為我睇到佢嘅優先股公允價值虧損喺2022年一定會大幅縮減；另外佢嘅員工成本喺2022年上市後都可以控制得好啲。


3. 不過令人覺得意外嘅係佢嘅收入竟然下跌14%，去到得返半年14億。同一時間佢嘅毛利得9億，跌22.5%，而毛利率都由73%下跌到66%。
4. 喺收入跌、毛利跌嘅情況下，虧損由上年同期37億，縮窄到32億，減幅13.6%。呢個說明佢嘅費用係減得仲多。
5. 收入突然雙位數下跌，當然係一個警號，銷售收入半年14億呢個數，其實仲要差過2019年全年收入嘅50%、 2020年全年收入嘅一半。
6. 業績解釋係1)智慧商業（商業監控業務）、2)智慧城市（城市監控業務）受國內疫情封城，影響產品交付時間，設施建設進度，所以收入確認延後。

7. 所以智慧商業收入得人民幣（下同）5.7億，同比下跌12%，智慧城市收入有4.3億，同比下跌成45%。
8. 嗱，呢個原因唔係無道理，不過好快可以被驗證，因為照佢咁講，如果下半年無再有嚴重疫情封控，收入下半年就會有比以往顯著增幅。因為佢都有講6月有開始快速恢復……

9. 我個人就會有小小保留，疫情防控係一定有影響，但個影響係幾大同埋係唔係個主因，可能要睇下半年數字出嚟。
10. 可能係我職業病、小心眼，你話疫情影響，我就睇番佢招股書2020年疫情年啲數比較2019年啲數，當時智慧商業收入2020全年有12億（半年規模大概6億），同比升23.4%；智慧城市收入有13億（半年梘模大概6.5億），同比升7.7%。
11. 其實當時嘅規模唔係同而家差太遠，但疫情嘅影響並無阻礙佢呢兩個板塊當時嘅整體淨增長。當然為咗上市IPO當時一定更出力谷。
12. 不過公平啲，智慧生活（即係面向消費者嘅手機、手遊、醫療、教育）同智慧汽車業務喺今個半年期收入分別有2.9億，增長98%同埋1.2億，增長71%。
13. 另外，業績都有解釋毛利率顯著下跌係因為「客戶需求致令硬件成本於銷售成本中佔比增加所致」。

14. 客戶需求、硬件成本上升，其實應該要rephrase「客戶對硬件要求提高咗，所以我地生產成本上升咗。」
15. 呢個說法可以肯定嘅一點係佢製造相關產品嘅材料成本提升咗。
16. 做生意嘅嘢，突然間話滿足唔到客戶要求，點解？
17. 一係上半年嘅產品生產質素跌左，多咗達唔到標準嘅產品數量，需要用更多材料去補番啲次貨。一係啲客難服侍咗，突然間唔滿意你嘅產品原有質素。
18. 真實係咩原因好難確定，但就好肯定呢一樣硬件要求提高導致成本上升好大機會會持續到下半年，因為客戶無端端唔會錫番你，同你講辛苦哂，你都係下半年求其得架啦。
19. 我會覺得成本壓力可能短期內都會持續，所以2022年全年top line 收入同毛利率會繼續受壓，只能寄望佢其他費用成本再控制得好啲，抵消番個影響。
20. 疫情封控好轉對收入既正面影響，真係睇睇真實下半年數字先。
21. 如果係咁睇，整體要睇佢基本面有明顯改善，我覺得要等2023年啦。

聲明：以上內容純屬個人意見及分享，並不構成投資、買賣建議或推薦
Credit: CFO講年報