比較三隻最大線上醫療平台股：平安好醫生（1833）、阿里健康（241）、京東健康（6618）

1. 呢三隻平台股，主要做嘅都係直營醫療電商（即係自己線上賣藥）同埋醫療服務電商（即係拉籠商家、醫生提供線上醫療資詢、藥物買賣服務）。
2. 平安嘅兩大業務比例較平均，直營佔60%、服務佔40%；而阿里同京東就好依重直營業務，80%以上都係自己線上賣藥業務。

隻隻名都響、但唔睇數字真係唔知平安係咁差
3. 平安好醫生最新中期收入人民幣（下同）28億，同比跌26%。管理層話因為戰略性縮減某啲關聯度、盈利能力較低嘅業務。
4. 睇得多我嘅文都知「戰略性」呢啲字眼，係美化緊下跌原因，俾人印象係公司「忍痛」主動cut業務，唔係經營差俾對手蠶食市場。
5. 實情無得驗證，但佢所謂忍痛cut兩成低盈利業務，個客觀結果係毛利都減少咗25%。
6. 如果係cut低盈利業務，毛利跌幅照計會明顯低於收入跌幅，但而家係差唔多。而毛利率都只係「戰略性地」升0.49個百化點到27%，即係個所謂戰略唔work。
7. 佢嘅平台活躍人數，增長率得4.8%，互聯網平台增長唔夠5%，好明顯係飽和緊，重點係用戶人數上升，但收入都要下跌26%，即係呢啲用戶增幅無乜質素，帶唔到新增收入。

8. 其實對比由2019-2021三個財政年度，佢收入增長分係36%、7%、同埋今次中期嘅 -26%，即係一路走緊下坡，唔係今年先開始嘅事。
9. 當然，佢近三年都仲係未有盈利，一直處於虧損狀態，主因除咗收入無哂增長動力，經營費用佔收入比例超過40%都好關事，你收入100蚊，毛利得27蚊，之後要俾多40蚊費用，咁無得做。相比下面講嘅阿里同京東，就差太遠。

阿里健康算係阿里系比較生性嘅業務
10. 阿里健康最近中期業績，收入115億，上升23%，最主要係來自自營電商收入增長，因為平台活躍人數同比升3千萬（30%）到1.2億。
11. 但用戶人數增加30%，收入只增加23%，即係用戶人均消費係跌緊，大規模嘅用戶人數增加，好有可能係自營藥物商品減價所驅動。
12. 業務比起平安，叫做好明顯係上升軌道，但升幅係有放緩，因為對比過去三個財政年度，收入增長分別係62%、33%到今次中期嘅23%。
13. 雖然今次中期轉虧為盈，但毛利率似乎無乜辦法再提升，過去三個財政年度，毛利率由23%、21%、21%，下跌到今次中期嘅20%，好相信係做緊價格微調，提升活躍用戶數嘅策略。
14. 經營費用方面，履約物流、銷售市場推廣費呢啲直接同銷售活動有關嘅費用都有個位數%減少，喺收入有23%增長下，即係真係代表經營效率提升咗好多，唔需要洗咁多錢，都可以做更多生意。
15. 行政、研發費呢啲較為固定嘅費用同比都係持平，所以整體費用佔比收入由上年同期嘅22.5% 下降至18.6%，遠勝平安好醫生嘅40%以上佔比。所以今次中期開始有些微嘅1.6億盈利。

好嘢留番最後講
16. 至於京東健康，中期收入202億，有48%增長。增幅好過阿里好多。增長動力主要來自自營業務，因為活耀人數增加2300萬（21%）到1.31億。
17. 人數增加兩成，但收入增加接近50%，呢個係同阿里一個最明顯嘅分野。亦都係三隻平台醫療股，最優質、消費力最強嘅新增活躍用戶群。
18. 過去3年嘅財政年度毛利率由26%、25%、23%，下跌到今次中期嘅22%，即係要平台人數增長，價格都係要微向下調，只不過速銷效果好過爸爸好多。
19. 以增長速度嚟講，對比過去三個財政年度，收入增長分別有79%、58%同埋今次中期嘅48%，即係京東相對保持到最強勁增長動力。
20. 而佢最新公布嘅2022第三季經營數字，收入有105億，同比增長保持到42%，而累計頭三季銷售額有307億，已經做到2021年全年銷售收入300億嘅水平，即係全年業績都將會好見得人。
21. 經營費用方面，履約物流費用、銷售市場推廣費用佔比收入都係減少，同阿里一樣，但收入升48%，勁過阿里。
22. 而整體費用佔比收入由上年同期嘅28% 下降至21%，跌幅有成7個百份點，效率提升幅度都係勁過阿里，所以今次中期業績都做到有盈利。

總結
23. 平安好醫生線上醫療電商好明顯係比阿里同京東蠶食緊，人地雙位數升，你雙位數跌，做得特別差。
24. 而且費用比率極高，超過40%，又係差過阿里、京東嘅20%左右好多，總體真係遠遠落後競爭對手。
25. 阿里健康同京東健康都有來自身母公司集團電商平台引流消費者以及物流配送網絡嘅優勢。
26. 但相比起阿里，京動嘅收入增長明顯更有動力。毛利率同經營費用比率兩者都差唔多嘅情況下，銷售收入增長更平穩，更有動力嘅京動明顯比阿里長遠更可取。

聲明：以上內容純屬個人意見及分享，並不構成投資、買賣建議或推薦
Credit: CFO講年報