醫思醫療(2138)開支急增疑點多

醫思醫療(2138)上周五公佈全年業績，總收入按年增加33%，但盈利卻下跌60%，三個主要業務中，醫療分部的收入增長51%，醫療美容收入增長1%，獸醫及其他收入急增66%。

我一向較喜歡完美醫療(1830)，原因是業務較為簡單，以醫美為主打，醫思醫療就比較雜一點，因為本身有醫療服務，而且比重很高，這個業務在疫情初期十分有用，因為疫情頭兩年香港政府常做封控，醫美生意沒了內地客，收入大受打擊，只能靠本地客支撐，但因為醫思醫療有醫療服務，疫情中都要睇醫生架嘛，又驗吓病毒咁，所以醫思醫療在早兩年無論在業務及股價表現都不差，2021年度收入有20億元，2022年度有29億元，本年度就有38.8億元，而2021及2022年度的盈利可保持在1.9億元左右，但今年就急跌至6970萬元；股價就更勁啦，2020年受疫情影響無乜表現，但2021年曾由四蚊起步，炒到上16.26元。

股價勁，其中一個原因係本身的醫療服務做得唔錯，收入大增，而當中涉及很多收購而壯大的，另一個原因，或多或少就跟引入新世界(0017)鄭志剛為股東有關，2021年4月以7.8元批股，7月股價就創歷史高位16.26元，往後兩年就一直跌。

從2023全年業績條數睇，盈利下挫主要是因為註冊醫生開支及僱員福利開支急增所致，前者由去年度的6.55億元增至9.74億元，後者由去年的7.28億元增至10.86億元，兩個開支合共急增了6.77億元，整個集團收入增加33%，都係多了約9億元收入，但這兩個開支卻食了近七億元，非常誇張。註冊醫生開支的人數由去年度的251人增至313人，多了這62位醫生，開支增加了3億幾，平均每位醫生五球幾一年，雖然話醫生好搵就係人都知，但在2022年度，251位醫生只係每人261萬元開支，新增加的醫生的開支是否有點離譜呢？而僱員福利開支亦多了三億幾，但按業績所講，僱員人數是由2674人減至本年度的2579人，人數減而開支急增，又係另一離譜。

睇到呢度其實都可以將業績收起唔睇喇，咁古怪的數實在不必要花精神去研究，唯一值得看是醫美的一些數字，業績話醫美收入微增1%，但澳門及內地的收入是有溫和增長的，只是香港收入下降，而管理層歸咎於第一季度，即2022年4至6月時香港發生第五波疫情，因此受嚴重影響。大家都明白第五波的確令香港經濟停頓，但去年下半年開始將措施陸續放寬，大家的生活已復常了，真正通關是在公司的第四季(2023年1至3月)，雖未致於可扭轉整年條數，但有幾個月畀你追，都唔應該錄得下跌的，別忘記2022年度一樣有防疫政策，同樣沒有內地客，基數也不會太高，所以講來講去，都是想掩蓋通關後對醫美業務沒太大幫助，這個跟我們近月看報章得知相若，內地客來港的平均消費大減，醫美算係高消費的級別，似乎就深受影響了。

從這裡可以得知，下周三公佈業績的完美醫療，醫美業務不能寄厚望，但比醫思醫療好的地方是，業務簡單，沒有古靈精怪的開支，有能力都會盡量派息，睇吓主席歐陽醫生在業績後會否再出手增持啦，咁都可以炒一轉嘅。