Tesla最近狀況、分享財報係滯後、無用嘅觀點

1月頭Tesla跌到落USD110樓下？市場一片恐慌，當然我都驚。

1. 當時我做咗個動作：認真睇番佢嘅基本面，喺1月2日出咗篇文分析Tesla股價低迷的原因，反問：「Tesla有因素變差？」
2. 1月26日再出文，提到Tesla股價強勢之因由：「Tesla 業績不斷創新高，前景真係唔使擔心。之前市場話會俾人蠶食市場，好明顯係short sell嘅說法。根本成個市場都仲有好多增長空間…」
3. 4月又出多篇：「呢一刻人地對手做到嘅佢做到、人地做唔到嘅佢都可以做到、人地無諗過做嘅佢都開始做緊。相對嚟講，呢一刻佢仲係最好嘅EV公司」。
4. 夠長氣啦掛？但無呃你，真心覺得佢無問題，過去一個月已經升咗40%，年初至今已經升咗115%。好強勢同興奮，但同樣地，短期回調風險係上升緊
5. 所以我要等佢股價回一回：一晚可以跌5%，先出呢編文，等大家冷靜地獨立思考。升得太快，自然有資金止賺離場，當然無人估到幾時。
6. 二來係美股大市都係有不明朗方向，市場可能又醞釀緊新一輪加息憂慮，或者下半年嘅衰退憂慮，所以佢短期係可以隨時回調。

交易vs投資

7. 有人話財報一季出一次太滯後；圖表、技術分析最即時反映市場資金取向。
8. 我覺得兩樣係唔同嘅分析工具，無話邊樣好用啲，而係咩時候要用咩工具。
9. 如果你聽到一個技術分析派、day trader 同你講佢投資緊股票，你會感覺好怪，佢只係做緊交易。
10. 睇技術指標、跟住已定策略做交易，極端嚟講，連隻股票做咩業務都未知，已經可以做交易。
11. 又如果你聽到股神巴菲特做緊某隻股票嘅交易，你又會感覺好怪。因為佢係睇基本面、長揸，了解公司有前景（雖然13F揭示佢有短炒，不過佢長揸嘅可以揸好耐），先會投資落去。
12. 所以其實無絕對，分析財報係投資，真正了解間公司商業模式、前景。即係李嘉誠做deal 買賣，唔通佢睇圖表咩？當然唔係，佢睇嘅係基本面。
13. 睇財報亦都係左則交易必要嘅工具。左則交易，就係股價下跌時入市，一來增加將來股價回升時利潤空間，二來提升安全邊際（股神嘅投資鐵律），股價越跌得低，安全邊際越高。
14. 但大前提係，你係假設緊呢隻下跌到一定程度嘅股票，將來會大升番。
15. 以技術圖表嚟講，股價不斷下跌，穿哂位嘅股票，撈底只係接飛刀，因為市場資金都持續拋棄緊佢，未搵到個底時，你接嘅就飛刀。

Tesla係一個好好嘅例子分享

16. 呢個時候，如果睇圖表，技術分析，咁即時嘅訊息，個結論就係沽同唔好接。
17. 但左則交易，就係呢個時候要考慮入場。因為左則交易，就係等股價跌到恐慌性低，撈底，利潤相比追高更豐厚。
18. 但都係嗰句，你係假設緊，佢係會升得番好多。個假設嘅基礎喺邊度嚟？咪就係所謂資訊滯後嘅財報基本面。
19. 你係要真正了解間公司、行業前景，喺技術圖表面極度恐慌時，拎嚟提自己，反問自己究竟間公司有咩問題嘅最強而有力參考！
20. 有時間，可以再睇番我嘅Tesla 1月兩編文、4月一編文，你就會明我當時就係同自己，同埋同大家分享緊呢個左則交易思維。
21. 喺下跌嘅時候，問自己佢有咩唔好。Tesla嘅明顯例子：市場當時講緊嘅利空因素，係唔係真係出現咗？
22. 投行當時講嘅係佢將來市佔會俾人搶，呢個係預期、假設。唔一定錯亦都唔一定啱，但如果你真正了解Tesla嘅狀態，你會知到今時今日個產銷量，佢都係跑贏全世界，就算比亞迪最近多過佢，但比亞迪有一大部份唔係純EV，而且，比亞迪只係有優勢喺中國市場。
23. 咁你會覺得投行分析好武斷，或者會為short sell 鋪路，或者真心覺得係，背後目的真係唔知。
24. 但只係半年時間，以年頭計，用好即時嘅技術圖表、定用財報、基本面去分析Tesla，呢一刻會賺到多啲錢？
25. 當然講緊真係基本面好嘅，有盈利嘅，有持續競爭優勢、有business model 嘅先可以做呢個左則交易，利潤先大。
26. 當然你會話難度好大，風險好高喎，當然你睇完財報無基本面，無利潤、無優勢，你喺佢股價下跌時仲去接飛刀當然你賺錢難度大，風險相當高啦。

關於最近Tesla嘅Supercharger network

27. 最近Tesla 股價飛天，今季應該有大資金入咗，7月中睇13F報告會知。
28. 而佢最近最正面嘅消息面應該係由Elon Musk 去中國訪問開始，我記我都喺Patreon 較隨意講咗句：會唔會Tesla股價重振雄風？
29. 結果真係一路升，之後相繼GM、Ford，最近嘅Rivian 都宣布旗下電動車會加入用Tesla 充電網絡North American Charging Standard (NACS)。
30. 佢地三間車廠嘅官方公布字眼都幾乎一樣：
Will have access to more than 12,000 Tesla Superchargers in 2024
Will incorporate North American Charging Standard (NACS) charge ports in R1 vehicles starting in 2025.

31. 對Tesla嚟講，呢一刻象徵意義大過實質，一來要2024、2025年先開始提供charging service 俾佢地，二來呢幾個競爭對手暫時電動車產銷量唔高。
32. 但對呢啲競爭對手嚟講就好唔同：市場嘅共識（或者你直接睇到呢三間車廠加盟NACS），就會知道佢地本身用緊嘅NCC充電系統，無NACS咁可靠、方便嘅。
33. 變相令佢地，好難推廣自家製嘅電動車，「你充電網絡都唔得，我不如用番燃油車，或者買Tesla啦。
34. 所以一係佢地要花巨額去提升現有充電基礎設施，一係佢地就等現有燃油車客戶等得唔耐煩，走去轉用Tesla。
35. 另一個方案係同Tesla 合作，俾自家電動車可以接駁Tesla 充電NACS，可以得益節省基礎充電設施成本，可挽留現有客戶（現有電動車客戶或者係燃油車想轉電動車客戶。）
26. 佢地唔想多年經營嘅品牌忠誠度，就因為自家電動車充電系統唔得而令用家轉會，即係佢地唔介意市場轉電動車，佢地都可以供應，佢地最驚係客戶轉品牌。
37. 佢地嘅成本係要支付充電費用俾Tesla，呢個可能係示範作用，其他無用NACS嘅車廠都會相對更易接受加盟Tesla。
38. 呢個最終會加速北美電動車充電系統普及化同標準化，對電動車市場嘅增長會有整體帶動作用。
39. 以往傳統燃油車廠根本唔需要煩加油問題，因為石油中游企業已經鋪設好龐大加油網絡。

40. 但電動車嘅充電網絡建設，一直係電動車普及嘅一大障礙。
41. Tesla嘅得益，除咗係將來充電收益增加外，兩大傳統車廠嘅背書，進一步確立電動地龍頭地位，龍頭地位唔係只係架車，而係另一樣必需要嘅完整充電網絡，變咗之後佢唔只係賣車，仲要係賣電嘅業務，即係做埋油站嘅業務。
43. Morgan Stanley 最近出咗個分析，話Tesla 嘅充電業務將來值1000億。呢個一定唔準，好多假設，但係象徵意義好大，一來傳統燃油車巨企都低頭，二來車廠做埋加油站，條數長遠嚟講真係幾和味。

下半場嘅策略

44. 另外一樣更重要嘅係佢而家喺自動駕駛領域嘅領先。
45. 點解話Tesla有AI概念，因為佢嘅下半場係自動駕駛，同而家嘅AI語言模式一樣，都需要大量數據運算能力嘅學習。
46. 佢嘅自動駕駛系統都需要大量嘅道路數據去提升（學習）自動駕駛嘅準確性同埋安全性。
47. 仲有2023年產180萬架，長遠50% annual growth rate ，墨西哥gigafactory，Cybertruck ，robotaxi ，諗起都有排攪，但即係仲有好多波升幅嘅理由。
48. 點解我一開始話要等佢股價回一回先出呢篇文，就係要大家冷靜同獨立思考佢現價升得有啲急，但長遠我覺得佢係可以用價值投資嘅角度去長期持有，但而家高追當然心理壓力大，而佢係可以長期持有嘅，就唔急於一時高追，短期回調嘅機會係越來越大。
49. 跟住落嚟嘅要大家按自己情況獨立思考。