美團(3690) 2023 Q1業績，有部份需留意……

1. 美團市場焦點兩個位：
a) 外賣業務有冇被抖音或者其他競爭對手明顯搶走？
b) 新業務收入增長係咪保持強勁，經營虧損係咪進一步縮細？

同比2022年Q1情況

2. 核心本地商業收入429億，（包含外賣同酒店、到店、旅遊業務）一如以往錄得強勁增長，增長26%。至於新業務收入157億，同比增長30%，依然保持住一貫強勁增長。
3. 另外，核心本地商業經營利潤竟然有 100% 同比增長，一年前係47億，今季有94億。
4. 呢個係好驚喜，冇人預到佢個核心商業嘅經營利潤率，一下子由一年前嘅14%升到22%，盈利能力大大提升。
5. 新業務經營虧損50億，同比減少40.5%，即係再一次大幅進步，令到個經營虧損率再次縮細，由上年同期嘅69.9%跌至32%。
6. 同比數字嚟講係完美、有驚喜。係唔係已經解答哂上面兩個問題？唔係，要睇埋環比。

環比2022年Q4情況

7. 以往都係每年Q4係銷售旺季，總收入通常會好過之後嘅Q1。所以佢今次環比收入，核心本地商業跌咗1.3%，新業務跌咗5.6%
8. 呢個結果可以講就係兩種因素互相抵消：季節性因素令環比下跌，但上年Q4係疫情高峰，今年Q1叫做復常，又對銷情有正面作用。
9. 互相抵消之下，起碼睇到冇乜大走樣，都係5%左右嘅跌幅。
10. 環比嘅亮點係核心本地商業經營利潤都增長30.9%，好犀利！
11. 新業務嘅經營虧損環比下跌21%又係進步明顯，新業務嘅經營虧損率由上季38%再縮減少少到32%，代表我成日講嘅新業務要做到盈利又邁進一小步。
12. 就咁睇美團今季嘅收入保持增長，盈利能力整體提升，其實對市場應該係有驚喜、超出預期。

細微位要留意

13. 我唔係太擔心新業務嘅進度，反而美團嘅外賣業務究竟有冇被抖音或者其他競爭對手搶咗啲呢？
14. 有啲細微嘅嘢市場可能冇乜人會睇到同講：就係喺佢核心本地商業收入嘅明細有：配送收入、佣金收入、線上營銷收入、其他收入。
15. 如果係外賣相關嘅應該只睇配送收入，佢嘅環比由198億，跌咗14.5%，到169億。
16. 呢個環比跌幅應該係近一兩年最大嘅，但係佢嘅佣金收入都係外賣業務嘅收入之一，環比係有升8%。
17. 佣金又唔單只係外賣服務，可能仲有啲係來自酒店、到店業務嘅佣金收入，所佣金升跌難以判斷外賣業務情況。
18. 銷售收入唔係好清晰睇到個情況，可以直接去睇經營數據，走去搵返啲交易用戶數、活躍商家數、即時配送交易筆數等等。
19. 一搵發現今次業績冇再出交易用戶數、活躍商家數嘅實際數字，只係出咗即時配送交易筆數係：42.67億筆。
20. 當然同比上年係升咗27%，呢個同佢配送同比收入25%增長好一致。但呢個筆數環比係跌咗12%，係應該近一兩年環比跌幅最大嘅一次。
21. 你話唔係喎佢嘅環比收入只係跌咗1.3%，咁點解好似唔係咁一致？
22. 因為嗰個環比嘅核心本地商業收入裏面，仲有佣金收入、在線營銷收入同埋其他收入包埋。如果淨係睇配送收入，頭先講咗係跌14.5%，同交易筆數跌12%幾接近。
23. 而美團無端端主動唔披露一啲常規嘅經營交易數據，會令我覺得佢係想低調處理一啲唔好嘅數據。
24. 雖然佢文字上有講環比嘅銷售成本下降同埋交易筆數下跌都係因為季節性因素。呢個一定有，但係有冇其他原因呢，而家好難可以睇得出。
25. 配送收入有明顯下跌，係一個訊號，而佢主動減少左呢啲經營數據披露，又係要有少少警惕。
26. 總結：星期一正常反應美團都係會升（除非大市真係咁疲弱）始終佢大部份都表現得幾好，而且整體真係盈利能力大升。經營利潤36億，同比係虧損56億，環比都係虧損7億，呢個係自從佢有新業務以嚟第一次有咁明顯嘅利潤。