滙豐(5) 恢復季度派息，可以安樂收息？

基本業績數據

1. 滙豐 2022全年業績，收入（美元，下同）517億，同比2021微升4%；雖然食正加息周期，淨利息收入有326億，大升23%，但非利息收入115億，就大跌13%，所以整體只係微升。
2. 市場一致預期，聯儲局2023年都係會keep 住加息，所以管理層好有信心直接講埋2023全年會有360億淨利息收入，即係將會升11%，呢個係好清晰嘅增長前景。
3. 尋晚最新聯儲局會議紀要都講咗通脹放緩中，但距離目標2%依然好遠，加息唔會咁快玩完。
4. 致於非利息收入縮水13%，主要係保險業務表現差、財富管理收入跌，投資情緒關係，客戶投資活動減少導致收費減少、仲有資本市場業務費用收益都係全線下跌，呢個睇落好似差過渣打喎。
5. 主要費用方面，預期信貸損失撥備，由2021年回撥9億（即係收益），大幅上升45億變成到撥備36億（即係費用）。
6. 2021年回撥因為2020年疫情因素恐慌性做咗88億撥備費用，咁疫情無想像中咁恐怖，2021知撥多咗，咪reverse番9億。
7. 但2022年嘅主題係內房客戶default 風險，又撥咗36億，即係呢一刻，管理層覺得疫情係驚過內房嘅，因為佢地覺得防疫政策終於躺平，對房地產行業預期會放鬆監管政策。
8. 經營費用由2021年嘅346億，降低咗3.7%到333億，呢個係抵讚嘅，因為唔似信貸撥備咁數字遊戲，撥嚟撥去；亦都唔係靠外圍因素加息減息，係扎扎實實管理層死慳死抵、效率提升嘅表現。
9. 股東應佔利潤148億，同比升18%，利潤率29%，同比2021年25%升4個百份點；有形權益回報9.9%，比2021年8.3%升咗1.6個百份點，無可否認，呢啲都係整體效益提升嘅表現。

展望

10. 2022年業績表現的確唔錯，利息收入係主打。2023年將會繼續，管理層好有信心預測，淨利息收入會起碼有360億，即係雙位數升幅。
11. 非利息收入，管理層唔夠膽預測。佢地有提2022年市場整體投資情緒較弱，對地沿政治、衰退憂慮所以減低投資意欲，而加息收水，都係會影響投資氣紛，所以正路呢個trend 2023年都係咁。即係2023年再大跌未必會，但就唔好寄望係增長主力。
12. 另一個好消息係2023年平均有形權益回報率至少有12%，比2022年9.9%都叫做再提升一個層次。如果佢個有形股本無大變，2023年嘅股東應佔利潤可以去到179億，預期同比升20%。
13. 呢個喺管理層嘅角度睇，唔難做到，因為淨利息收益360億，算係幾確定同埋佢地內部係計到數，而其他收入假設唔再大變，經營費用應該可以再減少少。但變數就係預期信貸撥，唔知啲風險嘢到今年年尾係咩景況。
14. 而2023、2024年佢地的派息比率都會係50%， 好過上兩年嘅40%同44%。但就2023年5月出第一季業績時先決定有無額外回購，始終市場變數多，要留一手。
15. 而講到出口嘅2023年第一季恢復派息，都叫開心嘢，終於等到啦；賣完加拿大業務，2023年底會落實派0.21美元特別息，但要2024年初派。出年嘅事，有眉目就要講出嚟刺激吓股東。

潛在炸彈

16. 好嘢講完，最關心嘅國內房地產信貸風險，全年36億預期信貸損失，其中有22億係內房相關嘅第3階段撥備（第3階段即係入得ICU嗰批，走數風險好高）。
17. 內房相關嘅總貸款額係168億，信貸質素合格嘅，分Strong、Good、Satisfactory三類，有95億，我當好安全。
18. 唔合格嘅分sub-standard同credit impaired（即係已經有走數跡象）嘅有73億。
19. 呢73億裡面，做咗撥備嘅有19億。即係54億係有走數跡象但無做撥備。
20. 咁有無抵押品？管理層話抵押品唔係無，不過佢地最重視嘅係客戶嘅償付能力，所以佢地無清楚披露究竟無做撥備嘅有幾多係無抵押。
21. Although collateral can be an important mitigant of credit risk, it is the Group’s practice to lend on the basis of the customer’s ability to meet their obligations out of cash flow resources rather than placing primary reliance on collateral and other credit risk enhancements（有抵押品，可能變現唔到，即係唔係太cash flow resources）.
22. Depending on the customer’s standing and the type of product, facilities may be provided without any collateral or other credit enhancements（講個信字）.
23. 無數據就保守啲睇，就算有抵押嘅都係部份係國內物業資產，而家都唔知值幾錢，同埋唔係佢所講嘅cash flow resources，所以爆獲起上嚟，市場仲理得你有冇抵押資產。
24. 仲有一件事，無咁快，但又好似發展緊，就係潛在金融制裁風險，啲嘢喺哂度，睇吓郁唔郁。
25. 俄烏戰爭個陣營都好鮮明，西方歐美撑烏克蘭、中國唔直接講撑俄羅斯，但就係人都知。
26. 美國都講明中國有跡象援助俄羅斯，咁上年俄羅斯銀行俾美國金融制裁，都攪到好大獲。內銀或者港銀會唔會有相同風險，機會大定細？我就真係唔識，但講唔埋，要有可以係一晚之間。
27. 你唔會諗到Joe Biden 突然現身基輔街頭，兩會後，可能習主席就會去莫斯科…..而匯豐個管理層，就喺佢份密密麻麻嘅英文年報講咗個風險啦：
28. The relationship between China and several countries, including the UK and the US, remains complex. The UK, the US, the EU and other countries have imposed various sanctions and trade restrictions on Chinese persons and companies（香港呢？）and may continue to impose further measures. In response to foreign sanctions and trade restrictions, China has imposed sanctions and introduced new laws and trade restrictions that could impact the Group and its customers. Further sanctions and counter-sanctions, whether in connection with Russia or China, may affect the Group and its customers by creating regulatory, reputational and market risks.唔知係黑天鵝定係灰西牛呢？

結論

29. 最令人期待嘅每季派息、業績整體算做得幾好，但興奮過後，連2024年嘅特別息都講埋，仲有咩利好因素係未反映喺現時嘅股價？
30. 內房嘅risk exposure absolute amount相對可能細過渣打，但都唔細，唔好話真係爆，有啲壞消息，撥多幾個百份點，都好影響利潤。仲有潛在金融制裁風險呢？股價近年高位，加息最多玩到2024年，就算無爆獲，食吓驚風散，都係好唔安樂。

相關閱讀：
渣打銀行(2888)股價強勢之原因
解析四大內銀股

聲明：以上內容純屬個人意見及分享，並不構成投資、買賣建議或推薦
Credit: CFO講年報