創科實業(669)再次被沽空機構狙擊，利用漏洞將大量貨品以次貨出售
1. 今次沽空報告係話由創科生產、但只可以由HomeDepot獨家銷售嘅某類產品，竟然會喺創科嘅直銷店（實體+Online）度可以買到，而且平好多。
2. 創科個走盞位，係將自己賣嘅呢類產品，加個「次貨」標籤（Factory Blemished)（但又根本無任何瑕疵），咁就可以自己賣。
3. 我估呢個係HomeDepot同創科之間嘅採購協議條款：「如果創科供應嘅產品，品質唔合標準，HomeDepot唔會接收，創科要負責自行處理品質有問題產品。」
4. 所以沽空報告重點就係話佢利用呢個漏洞，將大量嘅呢類產品，貼個次貨標籤，就可以自己賣HomeDepot獨家銷售產品。
5. 又可以慳番一筆廣告費，而且價錢仲平過HomeDepot，完全搵哂HomeDepot笨。
6. 呢個concept咁似山寨名牌手袋、包包……而且個報告話呢樣嘢令HomeDepot 無咗10億計美元嘅銷售收入，而創科如果唔係靠呢個手法，會少咗三份之一的經營利潤。
7. 有賣到呢啲Factory blemished product其實都好正常，因為你大量生產一樣貨品，一定會有啲次貨出現。
8. HomeDepot一定唔會接收呢批次貨，咁樣創科拎去賣、標示話次貨、賣平啲，即係所謂合約條款嘅「自己處理」都合情合理。
9. 今次沽空報告指控佢賣緊HomeDepot獨家產品，就應該成個市場、用家都好易睇到。所以創科唔可以用「有」同「冇」就反駁到。
10. 所以個關鍵係佢賣次貨嘅數量同HomeDepot自己賣嘅比例，你話10000件有幾件算合理，你話50:50咁就有問題啦。
創科回應
11. 創科當日收市後都有出公告澄清話：1）通常唔回應呢啲報告、2）話個報告係虛假嘅、3）同保留追究責任呢啲例牌嘢。
12. 但管理層覺得個報告太假啦，所以認唔住回應番少少，俾咗一個數出嚟：就係2022年佢地嘅直銷店總營業額係少於1億美元，佔全年總收入130億美，少於1%。
13. 創科出得呢個數係想講：就算我地真係有賣，根本賣嘅規模（喺2022年）都好細，唔過1億。即係理論上係有，但唔多，呢個就係上面所講嘅關鍵係個比例。
14. 上市公司管理層，出得呢個數，心理上係唔想完全企喺度俾人攻擊，要有啲反駁。但又唔想有任何一個位講錯，俾人做新攻擊點。所以一定係簡單、唔完整、但應該係真嘅。
15. 因為出咗呢啲資料，佢地都驚之後俾人抽掅講大話。所以市場感覺都放心咗，股價回番啲。而呢個數據，正常睇完第一感覺都真係會安心：好細數啫。
細微位
16. 但有冇留意佢只係提2022年直銷收入係少過1億美元，咁2021？2020？2019年呢？人地個沽空報告話佢呃咗HomeDepot 4年喎。佢呢個位係silent嘅，無講係少過1億架。
17. 仲有一個位，就係沽空報告話從創科直銷店網站，做吓啲sorting就可以搵到5億美元金額嘅相關產品可售存貨。
18. 雖然而家有5億，唔代表上年唔可以賣少過1億。但如果不嬲都係一年賣1億以下，咁呢一刻嘅存貨就要賣5年，就好唔合理啦。
19. 所以呢個位，我係沽空機構，實會咬住唔放，你話你一年得1億銷售，咁你存貨點會咁多？咁係2019-2021年又賣幾多？
20. 而且批次有問題嘅存貨點會金額咁大？如果佢quantify 呢5億係好扎實，有留哂底稿，就應該即刻拎出嚟同咬住唔放。如果唔係市場又覺得佢吹水。
管理層嘅考慮/困難
21. 我覺得以國內廠嘅習慣，自己去賣一啲客戶獨家銷售產品就一定有㗎啦，而且如果係品質真係有問題，佢點會喺美國市場賣得出去？又係嗰句比例問題，賣得多唔多。
22. 睇得多數就會明，啲數係死嘅，但你主觀點睇啲數就有啲操作空間，所以要選擇出咩數、唔出咩數。
23. 而創科今次只係提咗2022年嘅銷售係少過1億，即係代表佢之前嗰幾年每年可能有幾億。
24. 單睇一年唔感覺唔大，但如果創科咁老實講哂四年，加埋加埋可能就有10億、8億，咁個市場觀感就會差好多，效果差好遠。
25. 另外一樣嘢就係沽空機構嘅最終目的，並唔係要證實上市公司係咪真係有造假。佢最緊要就係製造一個noise，令到股價可以短期內大跌，咁佢就會有個位獲利。
26. 所以如果短期內佢都無再有聲氣follow up，可能佢已經收咗工，喺市場沽貨獲利離場了。可以肯定嘅係沽空機構應該覺得創科好好沽，好多位入佢，食過番尋味，變成咗創科嘅capital market risk factor。
