龍源電力(916)2022中期業績點評

詳細基本面、風險位之前講過，可以睇上次嘅分析文：解剖龍源電力(2380)，本文係更新返龍源電力(0916)最新業務狀態。

業績情況
1. 龍源電力今次份中期業績有少少複雜，又係要一步步講。
2. 總收入有217億 ，同比升11.8%，經營利潤有82億，同比就下跌10.5%。
3. 經營利潤率亦都由上年同期47%降至37%。呢個係表面睇到、亦都係出面財經新聞會報道嘅數字。

4. 呢度要讚吓自己，喺6月15日嘅龍源分析文，我預測龍源中期業績收入有191億，經營利潤有82億。

39. 所以，當佢近幾日出埋1-5月嘅累計發電量，風電發電量同比增加8.02%，火電發電量同比持平，咁其他可再生發電量同比增長81.09%，咁中期業績只係剩番6月一個月數未出，除非發電廠有咩大獲嘢，一個月影響唔會大。所以2022年1-6嘅總收入大概可以估算到係191億。

42. 不過apple to apple，嚟緊中期業績，都可以用佢43%左右嘅經營利潤率去計經營利潤，即係嚟緊中期業績經營利潤有82億。

5. 即係經營利潤係100%準確預測到，但收入就比實際數字少咗，主因係我預計少咗火電相關業務嘅7億煤碳銷售收入、4億火電銷售收入。
6. 收入預計少咗，點解經營利潤都可以咁準？因為火電相關業務經營利潤率得4%-5%，微不足道。火電相關業務就算多20億收入，經營利潤都未必可以增加1億。
7. 所以預測龍源總經營利潤，望住風電發電量條數，大概可以計到。詳細可以睇番上次編文。但嚟緊全年數就好難，下面講點解。

同一控制企業合併
8. 話龍源電力(0916)業績有少少複雜，係因為佢喺2022年上半年，從控股股東國家能源集團收購咗一堆新能源嘅電力公司，令到今次中期業績要改埋2021年上半年嘅同比比較數字。

9. 龍源電力本身嘅控股股東係國家能源集團。而呢啲新收購嘅公司，都係由國家能源集團控制嘅。

10. 只不過而家將呢堆公司嘅持股控制權，由國家能源集團呢個阿媽隻手，轉咗俾龍源電力呢個仔隻手。
11. 喺國家能源集團嘅角度，個改變只係由直接控制呢堆公司，變為透過龍源電力間接控制呢堆公司、實質控制權無變。
12. 咁點解佢要賣俾個仔？因為想供個仔上大學，谷大龍源呢個上咗市嘅阿仔嘅業務或者想叫龍源幫手管理吓佢其他無咁規範嘅電力子公司。
13. 喺龍源電力嘅角度，佢就多咗子公司，業績嘅收入、費用、資產、負債都會多咗。呢種阿仔收購阿媽其他子公司，叫做同一控制下嘅企業合併。
14. 按照會計準則，同一控制下企業合併，龍源電力上年同期嘅比較數，即係2021年1-6月，（就算上年未完成收購）都要包返、加返呢啲新收購公司嘅業績，點解？係為左防止投股股東製造同比高增長假象。

會計嘢，有啲複雜
15. 因為無論喺收購前、定收購後，point 11講咗，全部公司都係國家能源集團控制，如果佢想谷大佢嘅子公司上市公司龍源嘅同比增長，佢係咁易撥啲自己控制嘅其他子公司俾龍源，咁龍源業務突然間就會有高增長。
16. 但呢個增長係控股股東控制嘅，唔係市場獨立產生嘅，所以有啲控股股東財技操作成份。
17. 所以，所有同一控制企業合併，要喺合併後，同一時間要改埋上年數去抵消番呢個、只係因為控股股東左手交右手而導致嘅增長，有啲改變過去嘅感覺。
18. 所以要留意，之後2022年全年業績，2021年嘅比較數都會改哂，面目全非，增長會好難預測，因為重述後包埋新收購公司嘅2021年全年業績數，而家都未出，要到2022年全年業績同2022年數一齊出。基數都冇增長幅度點樣預測？

經營利潤下跌原因
19. 如果真係搵返上年出嘅2021年嘅中期業績，佢嘅銷售收入原本係179億 ，經營利潤係81億，經營利潤率係45%。
20. 而經重述後嘅2021年中期數（加咗今年新收購嘅電力公司業績後），個經營利潤率由原本嘅45%，提升到47%。
21. 即係話呢啲新公司嘅收購，喺2021年上半年係提升咗龍源電力嘅經營利潤率。
22. 不過喺2022年上半年，龍源嘅經營利潤率又跌咗咁多，去到37%，明明新收購公司嘅盈利能力係會提升龍源本身整體盈利能力㗎？！
23. 主因係來自佢嘅風力發電成本增加。經營利潤上年係92億 ，今年係82億，即係減少10億。
24. 掉轉講即係成本費用增加10億。佢業績有講，風力發電嘅折舊增加咗6億，風力發電嘅員工成本又增加咗4億，就係呢兩條數令到佢嘅經營利潤下跌10億。
25. 就係呢兩條數嘅成本增加，令我覺得佢今個中期業績啲數係有啲複雜，佢業績冇講但係我成日覺得應該係關佢新收購嗰啲新能源公司事。
26. 因為我覺得好有可能今年上半年呢啲新能源公司嘅風力發電設備開始投產開始計折舊，相關員工人手亦都增加咗，但係產電力不足。
27. 同埋最奇怪嘅係，今年龍源中期績，2021年上半年的比較財務數字，係有加埋呢啲新收購公司2021年上半年嘅業績。

28. 但係2021年上半年嘅發電量，就完全冇加呢啲新收購公司嘅發電量數字，但係2022年上半年嘅發電量，就有包呢啲新收購公司嘅發電數字。
29. 咁即係點？即係今年嘅發電量數據同上年嘅發電量數據係完全無可比性。發電量係經營數據，唔係財務數據，所以佢地唔改番上年發電量，都吹佢唔脹。
30. 作為分析用途，財務數據改咗，但最關鍵經營數字竟然無update，唔係apple to apple，其實係好求其。好似風力發電收入升0.2%，但係風力發電量升10.25%，寫嗰個唔會覺得唔舒服？

總結
28. 龍源電力2022年中期業績嘅經營利潤，我可以準確預測，係因為我用佢一至五月嘅風力發電量，再加埋佢近幾年非常之穩定嘅經營利潤率。
29. 由2018年開始，中期一般都有43%以上，而全年都有35%-37%左右。即係利潤率下半年通常差過上半年。
30. 但係今年中期業績已經得37%，係一個幾唔正常嘅下跌，因為一直都咁穩定嘅利潤率破咗，一定係有啲特別原因。
31. 佢業績解釋嘅原因係折舊增加、員工成本增加，但係相對發電收入冇按比例增加。
32. 即係話某啲發電場已投產但係發電率不足。呢個唔知係唔係長遠問題，但就俾我聯想到係咪會關佢新收購嘅公司事。
33. 因為始終本身唔係由龍源電力管理開，營運方法或者效率可能會有大分別，可能佢嘅國企阿媽國家能源集團就係想俾啲無咁有規範嘅子公司俾龍源管教一吓，順俾食埋佢啲無咁有效益嘅成本。
34. 所以展望下半年，佢業績裏面只係講咗一堆廢話，無任何方向。我本身淨係望住佢風力發電量條數，都大概預測到佢嘅業績走勢。
35. 但係而家真係無咁簡單。我覺得佢呢啲經營成本下半年會再上升，因為過去5年，通常下半年會做得差過上半年，咁佢全年業績嘅經營利潤都應該會有更闊嘅雙位數跌幅，
36. 除非突然間佢風力發電量大增，但風力發電係睇天氣做人，好難會喺現有規模之下可以發電量大增。

聲明：以上內容純屬個人意見及分享，並不構成投資、買賣建議或推薦
Credit: CFO講年報