走馬看花睇中期業績

這幾天小孩開學，私務比較繁忙，但昨天有不少公司公佈業績，實在未有時間去逐隻睇，最快捷的方法是看大行報告，所以今早看了一堆大摩的報告，得來出的感覺是普遍都不錯，當中大摩固然會有些偏心，有些股係長期看好的，但不能夠否認，當市場都對港股死心時，也會帶著有色眼鏡去睇業績，只會看到差勁的，看不到有轉機的，所以隨時會看漏一些機會，以下就以走馬看花的形式，分享大摩對各股的業績品評。

敏實(0425)中期盈利按年跌27%，不過按半年計就增長10%，比市場預期的高，而去年上半年係有2億人仔特殊收益，如撇除此數，中期盈利其實只係按年跌4.5%。海外收入增長遠比內地收入強勁，電池盒業務收入按年暴增4倍，佔整體收入約7%，遠比早前多。毛利率回升至29.1%，亦是比去年下半年改善，這個亦因為電池盒業務的貢獻而扯高了。青冰相信這個業績應該會刺激今天開市造好，昨天隊了5%，全因國內電力供應的憂慮，不少做廠生產的公司昨天都跌得幾甘。

快手(1024)的次季業績亦比市場預期好，不過大摩無論幾時都係看好快手的，這點要留意。國內的業務在次季已經收支平衡，比原地預期早了兩季。流量已經連續幾季勝預期，而電商業務亦比大摩預期的好，因為次季是上海封城的時間呀，直播收入按年增長19%，又係比市場預期高7%。雖然份業績唔錯，但北水近期係力沽快手的，如果份業績無法扭轉北水的看法，今日即使開市升，都未必頂得到尾。

安踏體育(2020)個報告就講得簡而精，低預期+正面業務指引=良好股價表現。過去幾次業績會，管理層都無給業務指引，因為話宏觀環境有好多不明朗因素，但今次就有畀喇，指安踏同FILA兩個品牌在下半年，應該有按年有雙位數子的收入增長，難怪昨天中午出完業績，股價在西市中逆市升4%。不過安踏不是青冰杯茶，始終對福建股有戒心，都係略過不炒。

京東物流(2618)次季的盈利轉正數，雖然有被上海封城打擊，但毛利率仍然按年有上升0.7%，成本控制亦做得唔錯，不過大摩認為次季做得好，有賴來自阿媽京東(9618)的收入，不過大摩覺得這個收入在下半年會放慢。管理層仍然認為全年的非國際標準的盈利可以收支平衡，睇吓年底做唔做得到啦。

前藍籌昆侖能源(135)中期盈利按年升19%，撇除一次性虧損，盈利仲升39%添，大摩認為昆侖能源係燃氣板塊的首選，因為有阿媽中石油(0857)的低成本供應，而且有350億現金，淨現金數100億人仔，隨時可以借助收購壯大業務。

京東(9618)次季盈利都係勝預期，無論是收入還是盈利，不過收入增長都係輕微beat而已，盈利增長有賴是成本控制，京東6.18節的收入，按年增長10.3%。大摩預期第三季的收入可以按年升一成，尤其是電器銷售的收入，會受惠酷熱天氣，咦，咁其實電器股冷氣股都應該有得炒啊，不過，冷氣買咗返來，無電力供應都係冇得用架喎。

聲明：以上內容純屬個人意見及分享，並不構成投資、買賣建議或推薦
Credit: 青冰投資