解構阿里爸爸(9988)的人事變動

1. 之前都講過買爸爸見好就收，佢有好多故事講，但你又唔知佢有幾多問題存在，肯定嘅係整體趨勢向下。
2. 細心睇佢公告內容，就硬係覺得唔需要講嘅佢就講，應該交代多啲嘅佢就唔提。

3. 公告劈頭第一句：
「於2023年6月20日宣佈的計劃，本公司已於今日完成領導層交接，由蔡崇信先生接任本公司董事會主席及吳泳銘先生接任本公司首席執行官及董事。」
4. 呢個一早知根本唔使再出公告講，因為6月20日嘅公告已經講得好清楚。除非你交接完成唔到，咁就要出個公告交代吓啫。
5. 講完上面嗰句，個公告就即刻講個主菜重點：張勇離任智能雲CEO職務，現任集團CEO吳泳銘暫時代理接任。
6. 呢個先以不必要字眼：「6月20日的計劃」、「完成交接」去作開頭嘅公告，唔細心睇就會覺得張勇離任智能雲係一早有計劃，而且已經順利交接。
7. 實際一早公佈、安排交接嘅係張勇離任阿里巴巴集團主席以及CEO，喺9月10日生效。
8. 喺呢一日之前，就從來無公佈過佢同時會離任智能雲業務，所以就係即日宣佈即日離任智能雲，所以點解我講表面有計劃，實際就走得好急。

急嘅程度好無章法

9. 而且之後公告又話接替張勇喺雲業務職務嘅吳泳銘（即現時阿里集團CEO），只係暫時頂住檔，代替張勇做雲業務代理CEO。
10. 公告講到明之後會「另行為其委任管理團隊」，即係喺未有正式長期嘅管理團隊之前，就要張勇離任智能雲話事人一職。
11. 正常咁重要嘅職位交接（而且仲係攪緊雲業務IPO嘅重要時刻），做法應該調番轉。個舊嘅領導未走，新嘅就要返工。
12. 兩個新舊領導parallel 交接一年半載，一切交接順利啦，舊嘅先至離任（理想啲等佢上埋市後走）。但而家調番轉，唔通有好急原因？
13. 喺6月公佈1折6時，嗰時係無計劃要張勇離開智能雲。因為當時只係要佢唔做集田主席加CEO，只係專心做智能雲主管，攪好個IPO。
14. 如果當時已經連雲業務都唔俾佢管，咁唔會呢一刻都未搵到長期管理團隊，要由集團CEO暫時頂住先。
15. 而且上市公司管理層離任，一係就自己辭職一係俾人炒，自己辭職定係俾人炒通常公告都會講。
16. 但今次公告好似打漏咗字咁，無講原因、無講邊個炒邊個，連最老土嘅「個人發展原因」都無提，直接就話俾個集團CEO臨時接管。
17. 本身以為張勇係調任到其他職位，但公告最後一句：多謝張勇16年嚟嘅貢獻，即係宣布咗佢真係要喺阿里集團收工。
18. 仲有，公告係今朝7:57am先出，但公告日期係尋日9月10日。要喺公告日期後嘅第二朝開市前趕住出，通常都係啲內容複雜，例如業績數、重大交易嘅公告。
19. 因為好多條文、好多數要對稿，要check有無出唔齊嘢，可能對通宵，確保一齊無錯先出街。
20. 但張勇離任嘅公告其實無嘢複雜，Yes or No嘅問題，要等到開市前一刻先出，唔通真係好Last Minute 先有嘅決定？又係一啲唔尋常嘅跡象。

猜想

21. 張勇完全離開阿里集團（包括集團主席、集團CEO同埋雲業務CEO），都係一早計劃好嘅。原因我地永遠唔智知：可能不制雲業勇上市、可能近年阿里業務表現差…
22. 如果2023件6月20日宣布一折六時（利好消息），就同時間宣布集團主席、首席執行官全身而退，離開阿里管理層，又會引起市場嘅負面觀感。
23. 所以當時張勇就先留任雲業務，集團主席由更資深嘅蔡崇信接任，感覺就似唔係主席、CEO離任，只係內部調職，有更重要嘅任務（雲業務上市）交俾佢，成個觀感就正面好多。
24. 一間咁大嘅公司，咁多人材同制度，你啱啱先表現咗集團主席、CEO點樣預早宣布離任，點樣安排交接嘅章法。
25. 但旗下最重要嘅一個雲業務部門，個CEO離任就安排得咁急咁無章法邊個信？ 除非張勇有啲嚴重個人問題（健康、違規、雲業務有大問題），如果唔係無理由係咁嘅安排。
26. 所以張勇離任雲業務，感覺上好急，其實唔係真係急，只係延遲宣布一早定咗嘅嘢，所以睇落好急。