評論美股、港股、騰訊(700)業績

關於美股

1. 今季13F報告披露Michael Burry除咗短期持倉，然後沽清爸爸同京東，仲分別買咗2百萬張SPY（追蹤S&P500 ETF） 同QQQ（追蹤Nasdaq100指數）嘅 Put option。
2. 索羅斯基金都有加倉SPY 同QQQ嘅Put Option，累積計持倉分別到85萬張同53萬張。
3. 股神巴菲特上季除咗沽咗8隻股票，其中包括減持70%暴雪(ATVI)、沽45% General Motor、加倉Capital One 25%、建倉建築股DHI (只佔成個倉0.21% only)外，就無乜買新股，都係觀望態度，保持大量現金同現金等值資產。
4. 加息令經濟衰退硬著陸嘅預期呢一刻未睇到強烈訊號。但呢啲巨頭嘅行為，都似係對硬着陸或者股市重大調整，仲係覺得有機會。
5. 個重點係加息收水嘅影響見到哂未？佢地就覺得未浮現哂，呢個要時刻警惕。
6. 即係一年時間加5%息、高息口維持一年半載，市場頂得住，最多地區銀行爆吓煲。
7. 但同一息口水平再維持多啲時間，會唔會再有人、有板塊頂唔住呢？好難講。
8. 但累積嘅壓力尋日唔爆，唔代表以後都唔爆，但都係要時刻提醒自己，控制注碼。

關於港股

9. 港股就好易睇，無乜複雜嘢。記得6月我做經濟一週訪問，問港股下半年會點？ 我話偏弱、窄幅上落，冇講錯啦。
10. 中國而家係連官方經濟數字都進入通縮、衰退，咁實際上就更差，即係confirm通縮、衰退。
11. 青年失業率唔再公佈住，即係慘不認睹，好似疫情感染數，去到一個位，已經無感，都費鬼事再公佈，整體5.3%失業率有幾準，都值得深思。
12. 以前內房係經濟火車頭，而家自身難保、仲有金融系統，睇落危危乎苦苦爭扎，但嚴格嚟講已經爆爆地，而且你唔會覺得呢一刻已經係最壞情況掛？
13. 出口萎縮、消費減少、枱面嘅增長動力仲剩低啲咩？仲有係次次話阿爺放大招，都係得個講。
14. 我覺得唔係唔想放，係佢地都唔知有咩有效方法解決而家困境。放水降準減息一早做緊，但經濟衰退問題已經唔係借貸成本問題，係信心問題。
15. 仲有有個矛盾位：人民幣弱，所以港股弱；阿爺降準減息放水，港股有提振佢用；但放水會令人民幣更弱，咁個loop係放水令港股升，定港股跌？而家係束手無策。
16. 根本就係長期以嚟所有嘢過度槓桿、供求失衡嘅惡果。
17. 仲有就係成日主觀角度：經濟差股市差，阿爺就出招、國家隊進場，但人地國家隊可能用哂資源攪軍事同外交。
18. 港股好靠大陸，咁大陸而家咩環境？咁已經講完。唔複雜。
19. 一定有資金有人博反彈，所以真係會反彈吓，但有冇持續性呢？個持續性有冇咩嘢支撐呢？

總結：基本因素變咗，樓市係股市都係。

騰訊(700)業績

感覺增長動力漸見回復，除咗因為大市原因外，都係唔值得而家買，睇下面對比就好清晰。

20. 騰訊2023Q2業績，總收入1492億同比升11%、歷史第2高，但環比上季跌0.5%。
21. 三大業務當中廣告收入250億同比升34%、環比升19%；金融科技及企業服務收入486億同比升15%，歷史第2高，環比跌半億左右，算持平。
22. 增值服務收入742億，同比只升4%、環比更跌6%。因為當中本土遊戲市場表現疲弱，收入只有318億，同比只係持平，而環比上季更跌9%。
23. 不過管理層重點提到本土遊戲下季會回復同比增長。國際遊戲市場收入同比升19%，但環比跌4%。
24. 所以整體收入表現，廣告終於回復同比、環比增長強勢（+34%、+19%）、但又到增值服務轉弱（+4%、-6%）、金融科技企業服務叫中等表現（+15%、0%）。
25. 毛利708億升22%，創歷史新高、毛利率歷史第二高47.5%，經營利潤403億升34%，經營利潤率27%，上年同期22%。

呢個成績，貌似表現唔錯，但股價績後不升反跌。
26. 除咗大市之外，究竟市場點睇呢一刻嘅騰訊，其實可以立體啲，對比佢2021年股價高峰業績表現就會睇得好清楚。
27. 2021年2月，騰訊股價創收市歷史高HK$757，而喺2021年3月公佈2020年Q4業績時：
28. 收入連續5季增長25%或以上、毛利589億（當時歷史新高），連續5季增長25%以上，而且其中4季係30%以上增長；
29. 經營利潤連續3季強勁增長，由2020年Q2到2020年Q4分別升43%、70%、123%。經營利潤637億，係當時同而家呢一刻都係嘅歷史高位。
30. 市場都真係相當高效，股價歷史高位（2021年2月)，就係早過利潤歷史高位(2021年3月出2020年Q4業績）一個月出現。

再回顧近況
31. 總收入近5季同比增長分別係-3%、-2%、1%、11%、11%。明顯最近兩季回復增長動力去到雙位數，但距離2021年嘅連續5季25%增長，仲差好遠。
32. 毛利雖然今季創新高，值得俾credit，但又係增長問題，近5季嘅增長分別係-8%、-1%、7%、20%、22%。不約而同，最近兩季回復增長動力去到雙位數，但同顛峰時比效仲有一大大段路要行。
33. 經營利潤近5季增長分別係-42%、-3%、7%、9%、34%。同一pattern：今季明顯回升好多，但相比兩年前嘅43%、70%、123%仲差好遠。
34. 而且今季403億嘅經營利潤，仲低過2020年Q3嘅440億，同相比2020年Q4嘅637億差好遠，市場感覺唔會大。
35. 要認清兩件事：1）近兩季有回穩跡象；2）回復高峰增長好難。
36. 收入、毛利都連續兩季雙位數增長、經營利潤免強連續兩季接近雙位數增長，對上一次已經係2021年嘅Q2、Q3。
37. 而今季經營利潤嘅3成升幅，係唔計分派京東（2021Q4)、美團(2022Q4)產生巨額其他收益嘅情況下，近9季增長最多嘅一季。
38. 但如果市場係睇增長（當然係精細啲係anticipate增長再比較實質增長），咁佢今季嘅歷史第2高收入、歷史新高毛利，其實會形成咗巨大嘅基數效應，會阻礙佢喺呢兩條數，嚟緊幾季有持續突破性增長。
39. 因為以呢一刻嘅騰訊體量，當收入、毛利都創歷史高位，而基本盤微訊用戶12億一定係頂盡無得再升，收費用戶2億已經好多季無乜明顯增長，都好直接話俾你知，好難可以好似2020年咁季季25%增長。
40. 唯一經營利潤今季403億，相比歷史高位嘅600幾億仲可以話係低水，所以嚟緊都係要保持今季收入同毛利率水平之餘，如果可以搵番三兩季費用方面收一收油，砌到個利潤有連續幾季30%高速增長，都可能可以刺激吓中期股價。