Google、微軟最新業績分析

1. 首先短期股價升跌真係好難預測，尤其是業績前後股價特別波動。一來業績方向未必預計到，二來市場焦點、反應大細都係好難捉。

Google業績

2. Google 總收入746億美元（下同），同比升7%，經營利潤218億，升12%。
3. 個位數收入升幅可以帶動雙位數利潤增長，而且利潤率增加2個百份點到29%，都說明上半年裁員的削成本措施見效。
4. 市場擔心嘅Google Search，同比收入有5%增長，喺Gen AI 嘅浪潮之下保持到搜尋龍頭地位，點解5%都可以話保持到？下面講。
5. 最吸引係雲業務，收入80億升28%，連續兩季有經營利潤，個勢似係可以持續幫補吓本身得廣告業務有盈利嘅整體利潤。

微軟業績

6. 微軟2023財年Q4業績（2023年4-6月，佢年結係6月底）其實唔錯，企業ERP、Dynamic服務收入創歷史新高183億美元，同比升10%。
7. 雲業務收入都創歷史新高240億，同比升15%。但個人電腦因為PC市場依然疲弱，收入139億，同比跌4%，但環比都有回升6%，苦苦爭扎但市場係預咗弱。
8. 整體毛利390億，毛利率70%，比上年同期仲升咗2個百份點，經營利潤率43%，其實係好賺錢。

有解釋話Google雲業務好過微軟好多

9. 雲業務Google 收入增長28%，的確遠高於微軟15%。但微軟一季收入係240億，Google 只係80億，根本兩個規模。
10.你話規模細啲增長空間咪大啲囉，可能係。但最實際盈利能力：Google Cloud經營利潤4億，利潤率5%；微軟Intelligent Cloud 經營利潤105億，利潤率43.8%。
11.即係人地個底數經營利潤（105億）仲高過你個top line 收入（80億），而利潤率係差8倍，我睇唔到雲業務點解唔係微軟強勁好多。

股價績後變化，代表市場對AI憧憬嘅調整

12.喺7月25日，出業績前，微軟年初至今股價升46%，PE38倍。Google就升38%，PE28倍。
13.呢個股價升幅同估值差異係因為當初市場較睇好微軟喺AI浪潮之下跑贏Google。
14.年初Open AI ChatGPT 推出，微軟係創始股東有獨家使用權。ChatGPT俾人感覺煥然一新，比傳統search engine 升咗一個世代同層次。而甘啱第一季Google 嘅Bard喺市場面前出醜，股價一晚插8%記憶猶新。
15.嗰一刻嘅感覺，令市場睇好微軟較為弱小嘅Bing搜尋業務，有機會挑戰Google Search 雄霸咗10年有多嘅搜尋業務龍頭地位，呢鋪Google 大獲啦。所以直到業績前，一路走來，微軟股價升幅都好過Google。

如果微軟遲一個星期公怖Copilot可能效果好好多

16.直到今個月18號，再有實質消息傳出，微軟公布Microsoft 365 AI收費功能Copilot，將會向企業用戶收費，令到佢嘅Generative AI 概念，已經唔係停留喺成本層面，而係提升到產生收入層面。
17.今次真係掂啦，市場即刻有反應， AI真係唔係元宇宙咁虛，咁快見到個收費模式啦喎。於是微軟股價即晚升破咗USD360。咁又Copilot、又Bing ，一定全部好生意啦，所以市場預期呢份季績都可能有類似Nvidia喺5月時俾到啲好靚仔嘅下季指引數據啦。
18.點知瀨咗嘢下季嘅指引：Copilot 包喺裏面嘅Office 365 收入預期升16%，唔錯嘅。但市場真心覺得16%，好普通喳喎，而家係ChatGPT，Generative AI 喎大佬！
19.仲有說好的Bing Search取代Google Search 呢？指引係話中高個位數（Single Digit）增長呀。 今次掂呀Google!因為呢吓變相助攻咗Google嘅股價。
20.本身Google Search 咪增長咗5%咁大把，但最關鍵嘅係潛在競爭對手話下季增長都只係：s-i-n-g-l-e digit，咁即係雖然Google search 得5%增長，但年頭好有勢嘅Bing都係得個位數增長，咁即係暫時無威脅啦。
21.所以市場見你個指引copilot同Bing暫時都無乜料到，咁股價回番去公怖Copilot消息之前個水位USD338都好合理。事後諗番，點解佢唔喺業績嗰日或者業績後先公怖Copilot 呢？
22.即係先出指引Office 365 收入升16%（喺無Copilot憧憬之下），之後先話將會出Copilot，但預期管理，要一、兩季後先有嘢睇，係Office 365嘅新增長點，咁咪成件事唔同哂 ！
23.所以神奇地直到今日28號，微軟股價年初至今升38%、Google 就升46%，啱啱交換咗大家嘅升幅。而微軟嘅PE都回落到35倍，Google就升到上30倍，大家估直接撳咗，但係微軟其實依然係高啲，呢個就係績後我所講嘅憧憬調整，微軟之前實在升得太快。
24.其實市場明白最終邊個跑出無人知，但可以肯定嘅係佢地都要幫襯喺GPU領域絕對領導地位嘅Nvidia，所以更多資金追捧呢個上游供應商。
25.去到Nvidia 5月公佈今年第一份季績時，真實訂單爆棚，本來要2年時間嘅收入，已經反映喺下季指引度，即係當憧憬變成現實，而現實遠超憧憬，股價一晚即升25%。
26.所以市場都對微軟有期待，但當Copilot、Bing指引無遠超憧憬嘅現實喺業績睇到，結過當然令市場失望。而同時間，Google Search 又無乜受威脅，又有雲業務強勁增長加持，此消彼長，形成股價對比。

結論

27. 經過呢半年進展變化，我覺得對於AI浪潮，呢種新消息形成憧憬，之後要由實質業績、指引去做股價調整（可以向上：Nvidia、可以向下：MSFT），都會持續發生。
28.呢一刻一定唔係終點，Google唔係已經贏咗，只係佢比想像中無咁差。Copilot 係算出得快架啦，下季無嘢睇，但再下季、下年實有啲收入上嘅增長貢獻睇啦掛？
29.呢一刻，可以再一次肯定嘅係下游競爭激烈，實際情況主要依然係成本先行。因為要訓練、要運算、要時間，同埋要形成個業務模式。
30.暫時見到管理層嘅說法都係有前景，反應幾好，同埋要持續投入資本發展。就算有咗個業務模式，有收入，但個成本有冇效益？收入可唔可以 cover到個成本，繼而產生利潤呢？都係要一步步嚟。
31.所以AI浪潮之下，下游競爭者都係需要時間、成本摸索。但永遠憧憬快過實現，就憑Nvidia 嘅指引爆燈（訓練模型嘅成本），到微軟嘅指引頹廢，下游產業受惠AI嘅收成期仲未到。
32.但其實講真Google、微軟喺AI層面都好有實力，但呢一刻其實只係過咗半年，市場資金、股價行得太快，人地實質業務真係點會跟得上呢？