麥當奴(MCD) 2022Q3：不受經濟週期影響

1. 我覺得係佢持續穩定嘅經營模式，令市場開始反思、確立：喺疫情過後，科網巨企業績紛紛回軟嘅呢一刻，真正經得起唔同經濟週期考驗嘅，長時間保持競爭優勢嘅，可能係一啲舊經濟老餅股。

經營模式

2. MCD餐廳業務，一部份係自營模式，一部份係特許經模式。自營模式，餐廳收入會入帳MCD財報嘅銷售收入。特許經營模式，餐廳收入唔會入MCD財報嘅銷售收入，因為餐廳收入係屬於特許經營加盟商(franchisee)。
3. 喺特許經營模式下， franchisee以麥當奴名義經營餐廳，但要嚴格遵守麥當奴經營標準。初始及後續資本、餐廳裝修、餐飲制作器械、人工、燈油火蠟等資金成本，全部都要franchisee自己俾。
4. 而只有經營餐廳嘅場所，係由MCD以自置或簽咗長約嘅物業提供/租俾franchisee。所以，MCD收取franchisee嘅費用中，除咗特許經營費（franchise fee）外，仲有餐廳嘅租金。franchise fee同租金，都會按franchisee嗰間麥當奴餐廳嘅銷售額而定，但當然有一個最低金額。
5. 而過去十年，MCD收嘅特許經營費加租金，約佔美國地區franchisee餐廳銷售額14%、約佔全球其他地區餐廳銷售額17%。咁多年都係差唔多，好穩定之餘，仲有每年都有些微上升。
6. 對franchisee嚟講，佢地每年生意額扣咗14%-17%俾MCD後，剩番嘅餐廳收入，扣哂所有經營費用，就係全部自己袋。

經營模式轉變：Re-franchising

7. 由2014年開始，MCD就行緊一種叫re-franchising 嘅策略：就係減少自營餐廳規模、增加特許經營餐廳數量，目標係令絕大部份麥當奴餐廳都變成特許經營模式。
8. 剩低自營餐廳嘅作用，就係麥當奴不斷優化經營標準、營運模式嘅市場試點，但就唔係盈利增長點。
9. 2012-2016年間，MCD財報自營餐廳收入同特許經營收入（franchise fee+租金），比例大概係65% vs 35%；由2017年開始，比例就變成而45% vs 55%，即係特許經營收入貢獻由呢一年開始高過自營餐廳收入貢獻。
10. 好自然，自營收入因為咁而減少，由2012-2016年平均每年175億美元（下同），跌到2017-2021年平均每年100億，平均減少75億。
11. 當然特許經營餐廳嘅數量增加緊，特許經營收入都由2012-2016年平均每年90億，增加到2017-2021年平均每年113億，平均增加23億。
12. 心水清嘅你會諗到，此消彼長嘅同時，特許經營嘅收入增加幅度係唔夠cover自營業務減少嘅幅度。
13. 咁總收入就會因為呢個re-franchising策略而減少咗。無錯，2017年前，MCD平均每年總收入有265億，2017年後，平均每年總收入得213億，平均跌咗20%。

係唔係代表re-franchising 計劃失敗？

14. 雖然MCD每年平均總收入係跌咗20%，但其實經營利潤喺2017年前5年，平均係80億；2017年至2021年，平均係90億，增加12%。
15. 而整體經營利潤率，就由2017年前平均30%， 升到2017年後嘅平均42%。梗係啦，份母總收入跌咗，但份子經營利潤升咗，咁個利潤率當然大升12%。即係講緊absolute amount 同percentage嘅盈利能力，都係進步緊。
16. 點解升咁多？就係因為re-franchising，大大提高特許經營業務貢獻，雖知道特許經營業務嘅經營利潤率，2012年嗰時係83%，2021年依然保持到82%；而自營餐廳，經營利潤率2012年係18%，2021年都係18%。
17. 所以當MCD大力推行re-franchising，令特許經營收入佔總收入由10年前嘅35%增加到今年最新嘅62%，整體經營利潤率就會大大提升。
18. 即係麥當奴心諗，我自己攪餐廳攪餐死，咁多年嚟都係得18%利潤率，但如果俾人攪，我剩係賣個特許經營權，再強制佢地租我嘅物業開餐廳，咁我就有80%以上嘅利潤率。
19. 所以方向好清析，要推動整體盈利能力嘅增長，唯一辦法就係不斷shift自營業模去franchise 模式，所以就有個2014 開始re-franchising 嘅策略。
20. 當然，我地都唔可以嫌棄自營18%利潤率。因為以港股為例，雖知道大快活經營利潤率得2.8%，大家樂得1.8%，譚仔勁啲12%。

點解特許經咁高利潤率？

21. 所以點解有人會視佢為一隻地產股、一隻收租股。如果記得我上次講過九倉，做商場收租市好時，經營利潤率係70%以上，疫情期間就高過50%少少，直到2022年上半年，再次做到72%。
22. 九倉做嘅係租務管理，提供一個優質商場環境同配套俾唔同商戶，客戶自己承擔經營風險去做唔同類型嘅生意。
23. 而MCD做嘅係更優化嘅租務管理，因為佢提供嘅唔只係配套，而係一個高度標準化，有高度生意額保證嘅品牌餐廳經營模式，spoon-feed俾佢嘅所謂「商戶」去做生意。所以個利潤率係去到over 80%。

結論

24. MCD嘅真正實力係咁多年嚟都好穩定賺錢，飽歷唔同經濟週期嘅考驗，就算係2020年疫情時嘅利潤率，特許經營都有79%、自營都有14%、整體都有38%，高過好多所謂高科技公司。
25. 即係驗證咗快餐食物雖然係低檔次嘢，但就可以喺逆境時間依然賺到高利潤率。而疫情後嘅最新2022年Q3業績，特許經營利潤率更係有84%嘅新高。
26. 而整體經營利潤率，最新2022年Q3業績都有成47%，雖然低過2021年Q3 嘅48% 少少。但作為餐飲股，其實係好誇張，你應該冇諗過做餐飲可以有接近50%利潤率？
27. 呢個利潤率直情係高過哂所有FAANG股，就嚟拍得住TSM嘅50%，但講明fast food，所以唔會有TSM嘅inventory correction 嘅cyclical problem。
28. 做生意最重要嘅係盈利能力。尤其是對於一啲已經處於業務規模好大，好難再有明顯增長嘅行業。就算係銷售額高速增長嘅新興行業，如果仲係有重虧損，都係代表仲未識賺錢。
29. 無一個蝕緊錢嘅老板會同你保證，公司幾時一定有利潤，佢自己幾時有利潤就答到你，就係你買佢啲股票嘅時候。所以靠睇名氣、靠聽故事，真係不如實際睇數字會更有雙腳落地嘅感覺。