完美醫療(1830) 2023全年業績分析
細睇全年業績
1. 2022年4月-2023年3月係完美醫療2023財政年度，整體收入港幣（下同）14億，微升2.9%。
2. 但要留意2023財年上半年（2022年4-9月）收入係下跌緊16.7%，全年可以升2.9%，即係代表下半財年增長強勁，升32%。
3. 全年純利3.2億，微升3.4%，但又要留意，2023財年上半年（2022年4-9月）純利係下跌緊30%，全年可以升3.4%，代表下半財年又係增長強勁，升85%。
4. 就算以2023財年下半年環比2023財年上半年，純利都有9%增長；將今次全年業績分開上下半年睇，就完全證明咗我1月分析文所講，佢係復常受惠股，因為下半年無咗疫情，即刻業務有大解放嘅感覺。
5. 用呢種上下半年數分開睇嘅做法，可以較容易睇出一間公司業務有明顯逆轉、走出緊個谷底嘅情況。
6. 個概念就係好似大型科技股，每季都出業績（香港主板無強制要求，大隻上市公司出季績，只係跟美國做法，滿足大型基金股東、同市場慣例），令市場更易睇到佢獨立每季嘅最新表現進展，同時撇除咗表現較弱但已經係比較舊同過時嘅數據。
員工成本嘅啟示
7. 上次分析都有講，疫情會過，要做好準備迎接業務需求反彈，所以之前疫情嚴重，中期業績員工成本都只係跌4%。今次復常後員工招聘顯著增加，2023財年員工成本增加14%到4.7億。
8. 過去半年，美國大型科技股、仲有阿里、騰訊講嘅都係裁員。慳成本唔係話唔啱，但就說明佢地管理層喺裁員一刻，預視到業務增長會放緩，以當時員工規模，佢地擔心無效益、蠶食利潤。
9. 所以掉番轉諗，完美醫療管理層，睇到嘅係喺佢地自身經營業務範圍內，係仲有業務增長空間，驚唔夠人手接生意做！
大股東（亦係CEO）多方面反映對公司業務前景有信心
10. 公司大股東歐陽醫生7月4日、5日、7日喺場內拎咗2000萬現金，增持咗539.2百萬股，係最近股價急升嘅原因之一。
11. 增持後佢持股已經接近上市規則上限嘅75%，即係話佢已經買盡可以買嘅股數。真金白銀拎咗2000萬出嚟增持到持股上限，好難話佢對公司前景無信心。
12. 6月28日除咗出全年業績外，仲出咗另一個公告：喺2024年財年內（2023年4月-2024年3月），佢地會喺香港再開多10間醫療美容服務中心，並表示對業務前景樂觀。
13. 7月11日，再主動出公告話銅鑼灣及尖沙咀嘅醫療旅遊旗艦店，最新6月經營數據銷售合同環比升26.6%。雖然我唔知佢呢個醫療旅遊旗艦店本身基數規模係唔係唔大，所以令增幅明顯，但佢積極主動搶住公佈數據，係一種有啲好嘢唔想等到出半年業績先講嘅感覺。
14. 大股東增持、又承諾嚟緊一年開多十間鋪、又積極公佈最新經營數據，當然有催谷股價意途。
15. 但呢幾樣嘢，睇落都唔係虛嘢，佢增持拎自己錢唔係公司錢（當然全年公司有回購，但只係用900萬）而且買盡持股上限；
16. 開多十間鋪都係實實在在要用錢、具體觀察到，唔係概念、故事同憧憬。
17. 同埋今次業績留意到，佢已經連續8年派息比例超過100%。即係大股東揸盡75%，每年都會提現公司分派利潤仲要突少少，呢個俾我嘅感覺（喺唔影響公司經營流動性嘅情況下））係好實在同直接。
18. 我大股東、CEO，只要我努力經營好間公司號業務，我持股75%，有錢賺，我就應份派俾自己應得嗰份。
19. 令佢唔係純粹只望住個股價做人，而係集中喺經營度，因為經營得好有錢賺，佢就最直接受惠。相對無咩花巧嘢掩眼法，夠均真，咁所以少股民喺呢part又真係可以搭大股東順風車。
次次派盡利潤，會唔會影響公司業務經營同流動性？
20. 完美醫療今年3月底有6.7億現金，比上年同期升49%，而且無外部貸款（呢個好勁），即係高息唔關佢事。
21. 財報上財務費用，係講緊佢租金支出，係會計準則帳面概念，並唔係真嘅利息費用。就算嚟緊派末期加特別息要用2.1億左右，都仲有4.6億現金剩。而且佢每年由經營產生嘅現金淨流入（從業務生意收到嘅淨現金）就有5.6億，其實幾穩陣。
22. 所以就算年年派哂利潤，睇唔到會影響流動性，反而太充裕，佢喺2023財年拎咗2億擺喺銀行嘅綠色存款項目，詳細資料無披露，不過佢話整體擺喺銀行嘅存款，都係定期及儲蓄存款，所以都穩陣。
23. 反而喺高息環境下，佢2023財年有790萬嘅銀行利息收入，係2022年財年嘅4.5倍。所以佢現金狀況係進可攻（擴張分店數目，我希望佢係適度擴張），退可守（擺定期賺息）。
同行股價年初至今表現
24. 每間個別原因上次大概都講咗，但我本身年頭到而家都係睇好1830 ，似乎同市場資金喺同一板塊內睇法接近。
完美醫療（1830）升4.9%，PE17倍
醫思健康（2138） 跌51%，PE65倍；上次分析文連結：醫思健康（2138）純利下降，原因何在？
盈健醫療（1419） 跌5.9%，PE1.3倍；上次分析文連結：盈健醫療(1419)是否復常概念股？
希瑪眼科（3309）跌22%，無PE，即係無盈利；上次分析文連結：比較三隻香港大型醫療集團股：希瑪眼科(3309) vs 醫思健康(2138) vs 完美醫療(1830)
總結
25. 佢係復常受惠股，業務正從疫情谷底走出嚟，但業務增長仲未到高峰。2023財年全年業務嘅下半年增長強勁，理論上維持呢個水平，嚟緊中期業績（2023年4月-2023年9月數，嚟緊11月出），應該會更加明顯見到佢疫後反彈勢頭。
26. 呢個市場未必完全留意到，但或多或少都意識到，可能都係買緊、博緊呢一樣。
27. 大股東算幾實際，有錢賺就派哂息，大家大股東、少股東按比例分股息，夠直接均真。
28. 而且闊卓派完息後，都唔會影響公司嘅流動性同經營情況，繼續開鋪頭，感覺到，對大股東嚟講，呢個業務佢都幾滿意同有信心。
29. 隱憂係香港經濟睇唔會到短期會特別好，可以支持佢增長幾耐？定係做醫療美容嘅人口，本身都好有錢，經濟好同唔好都唔太影響佢地？
30. 除非好似上兩年嘅禁足，先真係影響佢地呢方面嘅消費？仲有中國業務而家仲係積弱，所以雖然佢地有錢，但我希望佢擴展都要小心謹慎，唔好太急，或者要分散地區投資。
