港股大市雖然估值低，有什麼因素值得憧憬？

補充對美團(3690)看法

1. 業績方向一路向好，唯一重點留意既部份就係配送收入大減，經營數據刻意披露少咗，之前篇分析已經講過。
2. 呢個短期走勢，無人會知幾時見底，但繼續落嘅機會大好多，因為大市都落得好快。去估短期股價走勢，就有呢個風險，接近賭錢，因為短期太多雜音、唔同嘅睇法去形成短期波動。
3. 但跌咁急，坦白講我都好意外，我起初以為係唔係有啲超大戶個別原因襯美團出完業績沽貨。到今日睇，覺得係整體大市走弱沽貨，只不過美團行先一步。
4. 今日網易同拼多多都分別高位回番好多。呢兩日我再認真望番啲最新宏觀數據，我覺得整體大市都無乜支持因素，當然同中國經濟數據弱有關。

中國經濟數據嘅觀察

5. 記得我上年尾講過2022年上市公司生意差，中國經濟差，可以講因為疫情，你唔可以話佢錯。
6. 今年3、4月我又喺節目度講過，年頭嘅股市反彈係因為復常概念，憧憬復常後中國經濟強勁反彈，但真正反唔反彈到，就要睇第一季同4月嘅實質數字，尤其4月嘅數字，會睇到係唔係有持續性，定Q1已經消化哂個疫後需求反彈？
7. 到2023年嘅4月，實質數據好似講緊反彈後勁不繼。

中國零售銷售額

8. 中國零售銷售額4月人民幣34910億，雖然同比2022年4月升18% (因為2022年4月係上海封城、疫情管控高峰，係2021、2022年兩年內最差嘅一個月)，所以2023年4月同比上升好正常。
9. 但環比2023年3月係跌8%，呢個要注意，因為係近12個月新低。就算比較2021全年12個月，都只有4月、8月兩個月低過佢；2022年嘅疫情高峰，都只係有3月、4月、5月三個月係低過佢。
10. 即係2021年、2022年有疫情影響，但24個月嘅中國零售銷售額，有19個月都係好過今年4月。咁除咗係真係復蘇後勁不繼、不似預期，都好難再搵其他原因。
11. 今年1-4月全國房地產投資額35514億，同比跌6.2%，房地產都毫無懸念繼續積弱，為促銷有啲仲要攪負首期。

支撐中國經濟增長嘅汽車市場

12. 總汽車零售1-4月589.5萬架， 同比上年都已經跌緊1.3%，新能源車銷售4月有52.7萬架，同比上年係升85.6%，但環比3月跌3.5%。
13. 用行業龍頭比亞迪數據（做得最好嘅一間）去睇，佢今年4月銷量係21萬架，同比仲升緊98%，但環比上月僅升1.6%。
14. 比亞迪一個月賣20萬架就係暫時嘅樽頸，之前分析文都講過，今年下半年、第三季BYD嘅銷量增幅可能會回落，因為佢上年9月開始銷量突破20萬架，最高係2022年12月賣23.5萬架，到而家都係徘徊喺20萬架左右。
15. 未必關佢產能、銷售能力嘅事，而係成個中國新能源汽車銷售走勢接近，市場4月環比已經跌緊，BYD仲有得升都好叻，但一定係一種增長後勁不繼嘅感覺。

中國CPI數據

16. 中國4月CPI同比一年前只係升0.1%，代表消費增長乏力，有機會係上年疫情嚴重，供應混亂、受限，所以供應問題導致嗰時嘅物價無走低。
17. 而今年理論上要需求大增，會搶高物價，但同時因為供應順暢咗，會舒緩番個物價，個結果就係物價只升0.1%。
18. 即係一加一減得個零，需求強勁反彈不似預期高，輕鬆俾回復正常嘅供應緩衝哂。無咗疫情掩護，經濟本身都真係弱。
19. 其實CPI咁marginal，仲要會有啲水份，中國好有風險變通縮，通縮會個個都唔想洗錢，唔洗錢，經濟更差，更唔想洗錢，惡性循環，經濟回復強勁增長就更遙不可及。呢個我係覺得港股走弱嘅最大原因。
20. 大陸而家行量寛，減息降準，日本又行量寛，理應對當地股市都係正面幫助，但可惜創新高嘅係日本股市，中、港股市就無運行，所以市場呢一刻真心唔buy。

整體大市睇法

21. 唔好以為而家已經夠低，都係係嗰句，無人知幾時見底，之前股市升而家要實際數據驗證，市場發現都虛虛地，之前賺咗嘅梗係走先啦。
22. 就算見底，都唔代表會即時升番，因為見底可以橫行，上升動力你要有新嘅憧憬、好嘅實質數據支持。但疫後復常、經濟強勁反彈呢個咁正嘅理由都用完啦，而且不似預期，咁而家呢一刻我就真係諗唔到仲有咩新憧憬。所以呢一刻好似隻隻都跌得好犀利，但就唔好太心急，仲有得跌嘅空間唔細。